Señora Jasmira Mora di POH:
ORANJESTAD (AAN): December, un temporada cu yen di actividad y fiesta, celebracion di Pasco y hopi comemento. Señora Jasmira Mora, Coordinadora di POH, ta splica e importancia pa durante e dianan di fiesta pa tene cuenta y ta responsabel cu e comemento y e tambe e bebemento.
E ta splica cu ta hopi importante pa festeha como tradicion di tur Arubiano, pero pashentnan mester tene cuenta cu diferente factornan pa cuida nan salud durante e dianan aki. Entre otro, limita consumo di alcohol pa motibo cu esaki tin interaccion cu remedinan cu nan ta tuma.
Nan mester corda hiba nan remedinan cu nan ora di sali pa si encaso haya problema ora di come cuminda cu mucho salo por ehempel cu por haci nan malo. Of nan por bebe remedi prome sali for di cas cu intencion di bay come. Pa esnan cu ta tuma insulina, corda cu no por cana cu esaki tampoco lag’e den auto pasobra e no ta bay ta mesun efectivo manera e mester ta. Limita e porcion di cuminda, come tiki. No necesariamente mester come un ayaca henter, of un plato di cuminda yen.
“Tene cuenta cu e cosnan chikito asina pasobra nan ta hopi importante. Salud di hende ta hopi importante y mester keda na prome luga. POH no kier limita niun hende pa disfruta di dianan di fiesta pero mester haci esaki den moderacion y consciente di e salud”, señora Mora e enfatisa.
