Ronella Croes, CEO di ATA: --- ATA preocupa cu Merca por bira riesgo 4
ORANJESTAD (AAN) – CEO di ATA, Ronella Croes, a bisa den conferencia di prensa Dialuna, cu un nota hopi importante, den e contexto di covid-19 y e efecto di e variante omicron riba turismo ta, cu ATA den dialogo cu otro autoridadnan a bin ta evalua e maneho di entrada na Aruba, di personanan cu ta bin di paisnan di riesgo hopi halto.
Ronella Croes a splica cu ATA ta haci esaki den anticipacion cu Merca lo wordo categoriza como un pais di riesgo hopi halto.
“Pues aki nos mester para keto y puntra nos mes kico esaki lo kiermen pa cu e impacto di e fluho di bishitante y turistanan for di Merca. Sigur ta importante, den e contexto aki, pa sigura cu e impacto aki no ta uno cu ta grandi di mas. Anto, netamente esey ta e motibo pa cual nos a haci e evaluacion aki, puntra nos mes si Merca wordo categoriza mañan como un pais di riesgo hopi halto, kico lo ta e disponibilidad pa Mericanonan haci e test den un dia, kico lo por ta e impacto como tal”, CEO Ronella Croes a indica.
El a duna di conoce cu ATA cu autoridadnan concerni a formula un maneho, unda esaki lo wordo presenta, consecuentemente, na OT (team operacional), y djey na BT (team di maneho), si ta necesario, pues el a wordo pasa na e canal di OT y si ta e caso ATA lo anuncia e ahustacion di e maneho aki, pa asina asegura na tur momento, cu ATA tin un maneho cu ta y ta keda stimula e biahenan for di Merca pero tambe cu ta keda mitiga e importacion di Covid-19 y su variantenan, basicamente.
“Pues, esey ta algo cu ta importante pa señala con nos ta duna atencion necesario na algo asina ey tambe, y nos ta anticipando riba posible cambio di maneho pa cu Merca, pero e ora ey tambe di biaha evalua esaki, y un cambio di maneho por ta aplicable tambe pa tur pais conforme e categoria di riesgo di e pais”, Ronella Croes a señala.
El a agrega cu di otro banda, mester recorda cu no ta Aruba so ta haci esaki. “Nos sa, con esaki ta bay, caba. Diferente otro pais tambe ta ahusta nan maneho; entre otro, nan maneho di entrada. Aki mester indica cu nos tambe ta preocupa pa e nivel di riesgo cu nos tin pa Merca, como e mercado principal. Nos ta aworaki na nivel di riesgo 3, pero e preocupacion ta, cu nos por ta moviendo na nivel di riesgo 4. Kico esaki kiermen, exactamente? CDC (Coronavirus Disease Covid-19) ta indica cu si bo ta pensando efectua un viahe na un pais cu tin nivel di riesgo 4, nan no ta recomenda pa bo viaha. Nan ta recomenda basicamente pa evita di viaha na e lugar eynan y si bo mester bay pa un of otro motibo, bo mester ta completamente vacuna”, CEO di ATA a bisa. Esey ta kico basicamente nivel di riesgo 4 kiermen, Ronella Croes a agrega.
