Organisacion Panamericano di Salud:
*mester redobla e esfuerzonan pa alcanza e obhetivo di 70% di vacunacion contra COVID-19
ORANJESTAD (AAN): Segun Directora di Organisacion Panamericano di Salud (OPS/PAHO), Carissa F. Etienne, casonan di Covid-19 a baha den Americanan pa prome biaha den cinco siman, pero el a urgi paisnan di e region pa keda alerta y mehora maneho riba otro emergencianan sanitario, manera bruela di macaco. E tambe a pidi e paisnan pa aumenta nan esfuerzonan pa alcanza e meta di Organizacion Mundial di Salud (OMS) di un cobertura di vacunacion di 70% pa 2022.
E directora di e organizacion a indica cu: "ta sano y salbo di malesanan ta un accion, no un garantia", mientras el a pidi paisnan di e region pa usa hermentnan cu nan tin den nan disposicion, manera vacuna, remedi y vigilancia.
Apesar di un caida general di Covid-19 den e region, Etinne a adverti cu cantidad di casonan ainda ta hopi halto, ya cu paisnan a notifica mas di 1,8 miyon di casonan nobo di COVID-19 den ultimo siman.
OPS a indica den un comunicado cu Canada a informa di un aumento di 20 porciento di casonan nobo y algun pais di Centroamerica y Sudamerica tambe a registra aumento.
Pa loke ta trata Caribe, hospitalizacionnan a aumenta na Cuba, Guadalupe, Guyana Frances y Trinidad y Tobago.
E directora a señala cu, manera a sosode na Europa, subvariantenan BA.4 y BA.5 di Omicron a bira esun predominante den Americanan, pero cu un diferencia clave, e cobertura di vacunacion.
E cobertura halto di vacunacion na Europa ta nifica cu mayoria di pashent cu COVID-19 por a maneha nan sintomanan na cas mes, pero den Americanan "un tercio di e poblacion ainda no a vacuna y 10 pais y teritorio ainda no a protege ni sikiera por 40 porciento di su poblacion", el a compara.
Mirando e mayor transmisibilidad di subvariantenan nobo, Etienne a urgi paisnan pa aplica medidanan di salud publico, manera distanciamento social y uso di tapaboca, y aconseha hospitalnan cu poco cobertura di vacunacion "pa prepara" pa un aumento di pashentnan cu COVID-19.
"Nos prioridad awor mester ta converti e vacunanan den inmunidad, sigurando cu e dosis cu nos tin por yega na e brasanan di e hende y salba nan bidanan".
Pero mientras 16 pais y teritorio di e region ya caba a vacuna 70% di e poblacion elegibel, y Colombia, Bermudas y El Salvador ta sigui nan di cerca cu 65%, otro 11 ainda no a alcanza ni sikiera 40% di cobertura.
Segun Etienne, mester adapta nan esfuerzonan na e preocupacionnan cu ainda tin rond di e vacunanan y colabora cu e comunidadnan pa desaroya strategianan di divulgacion den e zonanan unda e cobertura ta scars.
Dr. Etienne tambe a destaca cu casonan reciente di bruela di macaco y hepatitis agudo ta remarca ainda mas e necesidad di construi sistemanan di salud mas resistente cu por responde rapidamente na e riesgonan nobo y emergente. Pa sigura esaki, OPS ta trahando pa apoya y forma e proveedornan di atencion sanitario pa yuda reduci e deficit di 600.000 trahador den salud publico den e region.
"Awor ta e momento pa e paisnan aplica tur loke nos a siña di e respuesta na e pandemia y pa compromete na inverti den sistemanan di salud mas fuerte y resistente", a bisa.
