ORANJESTAD (AAN) — “E situacion politico na Aruba ta mucho mas serio cu sigur hobennan lo pensa. E investigacionnan di posibel accionnan castigabel den asunto di tereno, ta mishi cu reis
di AVP. Detenido y sospechoso Leoncita Arends ta yiu di Albertico Arends, uno di e politiconan mas importante for di prome momentonan di AVP.”
Entrega di lista ayera a haya atencion special debi na e hecho cu riba lista di AVP na 2017 tabata tin hende, cu awe ta parti di investigacion tocante otorgamento di tereno durante gobernacion di Mike Eman.
Na 2017 riba lista di AVP tambe tabata tin persona cu ta wordo menciona den e rapport cu a wordo compila despues di investigacion forensico riba desaroyonan na Refineria di Aruba, manera ta e caso cu Richard Arends pero tambe Mike de Meza.
For di momento cu detencionnan den e investigacion di terenonan a cuminsa, e lider di AVP, Mike Eman, a bini dilanti na forma fuerte y hasta acusatorio contra Ministerio Publico.
Pa Pueblo di Aruba un pregunta grandi tabata si Benny Sevinger, cu a bisa publicamente cu e tambe por wordo deteni, lo tabata riba lista di AVP.
Ta momentonan prome cu toque de queda lo a kita tur hende for di caya, lider di AVP, Mike Eman, a presenta cu e lista di candidato na Cas di Partido. El a anuncia cu Benny Sevinger ta riba lista pero na ultimo luga y no na number dos, caminda e tabata for di momento cu el a subi lista di AVP.
Atencion di Aruba antayera tabata principalmente dirigi riba e lista di AVP a base di e desaroyonan di investigacionnan penal.
Informantenan mientrastanto a mustra DIARIO cu pa comprende e peso di e investigacionnan y detencionnan cu a tuma luga, mester bay den historia di AVP, caminda ta topa cu sr. Albertico Arends no solamente como director di un emisora na Aruba pero tambe como uno di e politiconan mas prominente di AVP y cu lasonan estrecho cu e prome dirigentenan di AVP, cu tabata Henny y Shon A Eman (respectivamente welo y tata di Mike Eman).
E detenido Leoncita Arends pues ta yiu di uno di e politiconan mas prominente di AVP.
Albertico Arends tabata uno di e luchadonan grandi di AVP y a fungi como Miembro di Conseho Insular di Aruba y Diputado pa AVP.
Esaki ta reis di e lazonan estrecho entre famia Eman y famia Arends, manera informantenan a indica.
Pa loke ta trata e relacion Mike Eman y Benny Sevinger, informantenan a mustra cu Mike y Benny a forma un duo, tabata tin Henny Eman y Watty Vos, kende tabata omo di Benny Sevinger.
Watty Vos tabata uno di e politiconan cu a reforsa AVP ora el a dicidi di laga su partido original atras pa uni su mes na AVP y su presencia di AVP tabata sumamente importante pa e partido berde y a contribui enormemente na crecemento di e partido.
Estado di salud di Watty Vos a bay atras rapidamente despues cu un enfermedad a wordo descubri y na Januari 2001 el a fayece.
Tabata un perdida enorme pa AVP, cu pa eleccion na September 2001 a pone e sobrino di Watty Vos, Benny Sevinger, na un puesto eligibel riba lista pa eleccion dia 28 di September 2001, cu a wordo gana door di MEP.
Benny Sevinger y Mike Eman a reemplasa e union Watty Vos/Henny Eman den e partido y asina na 2009 nan tabata hunto di e Gabinete di Mike Eman.
Informantenan a mustra riba e union particular entre Mike Eman y Benny Sevinger cu ta resultado di e union Watty Vos y Henny Eman.
Observadonan politico prominente di Aruba ta sigui e desaroyonan actual den AVP y DIARIO ta sigui informa den un tension politico sumamente pisa debi na e reisnan y base di desaroyonan actual.
