DVG ta confirma
- Chens grandi cu hende na Aruba por a wordo contagia cu ne
ORANJESTAD (AAN): Directie Volksgezondheid Aruba ta informa comunidad cu dia 1 di februari 2026 Bonaire a raporta un caso importa di Sarampi (measles). Despues di investigacion epidemiologico, a saca afor cu e persona infecta tabata di transito na Aruba entre dia 28 y 29 di januari 2026, prome cu el a sigui su biahe pa Bonaire, esaki mientras cu e persona ya tabata presentando sintomanan di Sarampi.
E persona a biaha for di su pais di origen via Aruba y despues a sigui pa Bonaire. A base di e informacion aki, DVG ta considera cu por tin un periodo corto di posibel exposicion di e virus di Sarampi na Aruba durante e dianan menciona.
Resumiendo e scenario actual y teniendo na cuenta cu casonan di Sarampi ta sigui aumenta mundialmente y ta causando brote na diferente paisnan, DVG ta alerta comunidad completo, pero especialmente personanan cu ta traha den sector turistico, manera hotel, restaurant, aeropuerto y transporte publico, pa keda conciente di e sintomanan di Sarampi, proteha nan mes y tuma contacto cu nan dokter di cas si tin sospecho di Sarampi.
E sintomanan mas comun di sarampi ta: (*) Keintura halto, (*) Nanishi ta core, (*) Tosamento seco, (*) Wowo cora of inflama, (*) Dolor di garganta, (*) Cansancio fuerte, (*) Manchanan color cora riba cuero (rash), cu ta cuminsa na cara y despues ta plama riba curpa.
Desde aña 1979 Aruba ta ofrece vacuna cu ta proteha contra Sarampi na tur mucha cu ta residencia na Aruba. Segun datos di seccion Cuido Salud Hubenil, e cobertura di vacunacion contra Sarampi ta alrededor di 95% na Aruba. Esaki ta un nivel halto cu ta contribui significantemente na proteccion di comunidad nificando cu si presenta caso di Sarampi na Aruba esakinan probablemente por keda limita y presenta cu sintomanan leve.
Pero responsabilidad personal ta keda esencial, especialmente pa persona cu no ta sigur di nan status di vacunacion. DVG ta recomanda tambe e siguiente medidanan preventivo: (*) Laba man regular cu awa y habon of usa handsanitizer. (*) Tapa boca y nanishi ora ta tosa of nister. (*) Keda na cas si bo ta sinti bo malo y tin sintoma. (*) No manda mucha cu sintomanan school. (*) Verifica bo status di vacunacion si bo tin duda.
Te na e momento aki no tin ningun caso local di Sarampi confirma na Aruba. E alerta aki ta forma parti di nos sistema di prevencion y vigilancia continuo di salud publico.
