ORANJESTAD (AAN): Diaranson mainta Corte di Husticia a trata e caso penal cu Fiscal a cuminsa contra e hoben I.D. , kende tempo e tabatin 16 aña ta worde sospecha di a menaza un otro mucha cu un arma.
E hoben I.D. no a presenta pero su abogado si. Fiscal a exigi un castigo igual na loke I.D. tabata sera.
MENAZA CU ARMA:
E acusacionnan cu Fiscal ta acusa I.D. di dje ta cu (*) el a menaza un mucha cu un arma di candela riba 12 Mei 2018. (*) Tambe cu e tabata den posesion di un arma di candela y balanan.
Ta asina cu e sospechoso I.D. no a presenta. Hues a bisa cu tempo di e caso, I.D. tabata menor di edad (16) pero awor ta trata e caso normal. Mas ainda cu I.D. no a presenta.
EXIGENCIA FISCAL:
Fiscal a bisa Hues cu e ta haya legalmente proba cu I.D. a menaza un otro mucha. Fiscal ta puntra su mes si tabatin un arma di candela. No tin ningun prueba di esaki. Pesey e ta haya cu por acusa I.D. di menaza un persona cu algo parecido na un arma di candela.
Pa cu e castigo, Fiscal a mustra cu I.D. tabata 10 dia sera y no a cay cera mas. Ademas ta un caso di 2018. Fiscal ta haya cu e castigo cu I.D. a sinta caba ta na su lugar. El a pidi Hues pa declara I.D. liber di posesion di arma di candela.
DEFENSA:
Abogado mr. Sjem Fat a bisa Hues di ta contento cu Fiscal tambe ta haya cu no por papia di un arma. El a bisa cu tabatin un discusion entre e muchanan pero cos no a bay for di man. E ta laga na decision di Hues. El a bisa cu e mucha a desvia un rato pero awor ta riba bon caminda.
SENTENCIA:
Hues a sera tratamento di e caso y a dicta sentencia di biaha. Hues a bisa cu e ta di acuerdo cu Fiscal, esta cu por papia di menaza pero no posesion di arma di candela y balanan. Hues a confirma exigencia di Fiscal y a condena I.D. na e dianan cu e tabata cera.
