E caminda oficial pa por haya tereno tambe ta na disputa
- Imparcialidad total di Corte di Husticia mester wordo demostra
- Secreto di trabou versus e berdad pa sentencia por haci husticia
ORANJESTAD(AAN)- Avestruz ta conoci como e parha cu ta dera su cabez den santo.
Den e caso Avestruz cu lo cuminsa den sala di Corte di Husticia awe, un investigacion legal intenso lo mester saca e cabez di e Avestruz for di santo y expone na Aruba cantidad di berdad.
Pa esaki por ta posibel e sistema di Husticia di Aruba mester a subi e tereno misterioso na inicio di e caminda oficial pa un hende of instancia haya pida di e suelo di Aruba pa su uzo.
Un caso cu sin duda lo marca historia di investigacion criminal, ta start awe den Corte di Husticia di Aruba, cu cooperacion di henter Reino y sigur como resultado di un trabou pisa cu a wordo eherce dor di e aparato hudicial.
Den e personanan cu Huez mester scucha pa yega na un veredicto, tin dos abogado, cu tabata uno di e motibonan di discusion na caminda pa e tratamento di e caso.
Jill de Cuba y Joseline Croes mester presenta den sala di Corte pa contesta preguntanan cu lo wordo haci pa por yega na un veredicto.
Kico un abogado por bisa of dicidi cu e no por bisa den sala di Corte? E asina yama deber di silencio cu e tin enfrente su cliente, ta hunga un papel importante. Di otro banda ta hustamente e consehero legal di un persona por presenta puntonan cu otro instancia no por trece dilanti.
E caso avestruz ta bay tin un rabo largo ya cu mester haci uzo di tur forma cu mundo moderno conoce y di tur informacion cu tur instancia riba e caminda pa otorga tereno di Pueblo, por trece dilanti.
Aki ta atende pues cu e parti legal di un transaccion di tereno, cu ta uno di e factornan sumamente delicado den e totalidad.
E caso mester duna prueba di un imparcialidad total di Corte di Husticia y e funcionamento di democracia den e caso den cual e politico envolvi y acusa di un crimen, ta Benny Sevinger, cu te awe ta un Miembro di Parlamento pa e partido politico AVP.
Den otro articulo DIARIO lo analisa e nificacion intenso di e hecho cu ta un representante di un partido politico ta wordo huzga pa e acusacion di a abusa di su poder como gobernante entre otro.
Landsrecherche di Aruba a indaga na tur forma den e proceso pa sostene e acusacionnan contra Benny Sevinger dilanti Huez, cu mescos cu su Griffier lo ta di Hulanda mientras cu e Fiscal tambe no por wordo vincula cu mundo politico di Aruba.
E caso Avestruz ta otro di e casonan grandi cu a nace den gobernacion democratico di Aruba y ta haci cu e credibilidad politico na e pais ta wordo directamente afecta.
Awe den Corte di Husticia un pagina nobo ta wordo skirbi na momento cu un Parlamentario di Aruba, Benny Sevinger, presenta dilanti Huez acusa entre otro di a participa na crimen organisa den un neishi di haraña forma pa tur e acusadonan cu den curso di simannan venidero lo presenta dilanti Huez.
DIARIO ta prepara pa duna Aruba e mihor informacion di e proceso.
