Presidente di “Asociacion Venezuela Bolivar por la Vida”: - *Tin un wega politico contra gobierno di Venezuela
ORANJESTAD (AAN) – “Asociacion Venezuela Bolivar por La Vida”, a reuni cu Formador Wever-Croes den e marco di reunionnan cu stakeholders, den e caso aki den e area di Imigracion.
Señor Antonio Alcibiades, den su declaracion durante e conferencia di prensa, el a menciona cu e reunion a bay hopi bon, unda por a expresa dos punto di preocupacion, specificamente.
Uno ta e tema di frontera cu Venezuela cual ta un tema importante y tambe bastante serio y delicado, y e tema di e refugiadonan, pero tambe a papia tocante e medionan di comunicacion.
“En realidad nos por a expresa nos idea y e problematica cu nos tin, debi na e ciere di frontera pasobra tin hendenan tin problema cu esey, y tambe Aruba ta wordo afecta cu e ciere di frontera cu Venezuela.
Di locual nos a papia tocante e medionan y nos a haya pregunta den e reunion, y aki si mi kier haci un tiki enfasis, ta cu aworaki tin na Aruba dos emisora di radio cu ta trece programa completamente contra e gobierno di Venezuela. Pero esaki no ta afecta solamente e Gobierno di Venezuela; e ta afecta e Venezolanonan. Y manera mi a pone un ehemplo na Minister Presidente, si bo tin un mata chikito y na e mata ey bo ta pone un drop di veneno tur dia, kico ta bay pasa cu e mata? E mata ta bay muri. Anto mescos cu e pueblo di Aruba. E programanan aki ta wordo transmiti tur dia den un emisora y atardi den otro emisora, e ta pone un drop di veneno tur dia riba e pueblo di Aruba”, Alcibiades a señala.
El a agrega cu e ta un ciudadano, un trahador cu a bin biba na Aruba for di Venezuela, cu tin 27 aña bibando akinan. “Y bo tin cu wak e reaccion di hende ora bo ta bisa cu bo ta Venezolano of afecto cu e gobierno di Venezuela, con nan ta ataca bo. Otro nacionalidad, Arubiano y e mesun Venezolano, ta ataca e persona aki y esey ta debi na e efecto negativo y nocivo di locual ta wordo treci den e medionan ey tur dia.
“Mi kier pa pueblo di Aruba pone atencion riba esaki; no laga e cos aki bay den bo curazon. Cada persona cu scucha noticia tin e derecho y obligacion di investiga si e cos ta berdad. No laga e veneno ey bay den bo curazon pa despues bo bay ataca un persona”, Alcibiades a remarca.
El a agrega cu Formador a puntra tocante e cantidad di Venezolanonan cu tin na Aruba, supuestamente buscando status di refugiado.
El a expresa cu berdaderamente, casi ningun Venezolano cu ta bin akinan, cu no ta wordo persigui, ta cualifica pa tin status di refugiado, pero cu tin un wega politico contra Venezuela, y esey ta un realidad.
