CARACAS: E resultado di e asina yama Encuesta Nacional di Hubentud (ENJUVE) cu a ser haci pa Instituto Investigacion Economico y Social (IIES) di Universidad Catolico Andres Bello a wordo divulga e siman aki.
E informacion a wordo duna door di Anitza Freitez, director di e Instituto IIES, hunto cu Andrea Mesa di ENJUVE, y Luis Pedro España kende ta sociologo.
E estudio ta mustra e resultadonan di e encuesta haci na nivel nacional y ta ofrece un acercamento di e problemanan cu ta vulnera e derecho di poblacion di 15 pa 29 aña y ta mustra su percepcion y expectativa riba asuntonan manera identificacion politico, participacion electoral, educacion, empleo, y migracion.
Segun e estudio, di 2013 te cu 2021, e cantidad di homber y muhernan di 15 pa 29 aña di edad a cay na 6.817.000 persona. Migracion ta e motibo principal di e caida aki: Como 51% di esnan cu a bandona Venezuela den e ultimo 5 añanan ta forma parti di e grupo aki.
Cifranan ta mustra tambe cu mitar di e poblacion hoben ta bibando den pobreza, pues 47% ta cay den e dos categorianan cu ta mustra 40% di hogarnan di menos entrada. Tambe cu casi 40% di e hobennan Venezolano no ta studiando ni trahando aworaki, y esey nifica un doble exclusion.
E encuesta a inclui dato encuanto situacion socioeconomico, acceso na educacion, uso di tecnologia, presencia den social media, patronchinan di reproduci, y disponibilidad pa emigra.
E data di ENJUVE a wordo colecta entre Februari y Augustus den encuestanan haci cu 8.765 hoben di e casi 14.000 hogarnan studia como parti di e Encuesta Nacional di Condicionnan di Bida, y tambe 2.000 entrevista telefonico adicional.
