ORANJESTAD (AAN): Cas di Cultura (CDC), teatro y centro cultural nacional di Aruba, ta anuncia cu
e Auditorio lo cera temporalmente y di forma inmediato pa motibo seguridad. E condicion deteriora di e sala principal ta presenta riesgo pa seguridad.
E desicion aki a wordo tuma pa garantisa seguridad y bienestar di artista, bishitante y personal – cu semper ta e prioridad mas halto pa Cas di Cultura.
Mientras cu e Auditorio ta keda cera te cu proximo aviso, e resto di e facilidadnan di CDC – incluyendo e sala di exposition, INCBTR, foyer, Scol di musica Rufo Wever y Scol di baile Diana Antonette – lo sigui opera normalmente, cu evento, les y exposicionnan programa.
Stichting Schouwburg Aruba, cu ta maneha Cas di Cultura, hunto cu autoridadnan ta monitoriando y evaluando e situacion y lo sigui duna mas noticia ora esaki ta disponibel.
Cas di Cultura a percura pa inventarisa lugarnan alternativo pa e presentacionnan y eventonan cu tin programa pa e Auditorio, pa asina actividadnan cultural por sigui sin hopi interupcion. Lo notifica cliente y publico unda e eventonan planea lo tuma lugar.
Ya pa un periodo basta largo Cas di Cultura a cuminsa cu e plan pa drecha y renoba su edificio y na maart ultimo a lansa su campaña pa recauda fondo hunto cu A.I.B. pa realisa e plan di renobacion.
Desafortunadamente nos ta forsa pa cera nos Auditorio mas tempran cu a planea. Nos ta invita tur hende cu kier sa mas y kier yuda cu e futuro di nos teatro nacional, pa bishita nos website pa haya sa mas di e plan y informacion con tambe por aporta na e realisacion.
