ORANJESTAD (AAN): Algun luna pasa a haya sa cu tin scarcedad di e.o. Chicken Wings, y esaki e.o. a bin debi na e pandemia y tambe scarcedad di containers. Awor e scarcedad cu tin ta Bacon.
Y e scarcedad a yega tambe riba menu di e compania mas grandi di barco crusero, esta Carnival Cruise. Riba un video poni riba Facebook, e embahador di e marca Carnival, esta John Heald a bisa cu agencianan cu ta suministra e industria crusero tin problema pa haya bacon. Debi na e scarcedad aki, awor e compania a dicidi pa bin cu un schedule pa e pasaheronan haya sa ki dia tin Bacon pa nan come mainta pa desayuno.
Decision awor ta cu cada dos dia, nan lo bay tin Bacon pa sirbi pasaheronan. Esey ta pa e servicio riba Lido Deck. E dianan cu lo no tin Bacon, nan lo pone borchi pa indica “Today we’re not serving bacon”. Pero bo sa cu e siguiente dia si lo bay tin.
Bacon a bira scars y wordo menciona mas den prensa recientemente. Y na e estado di California (Merca), un ley nobo cu ta bay drenta na vigor na 2022 cu ta regarda bienestar di animalnan, lo por pone cu Bacon ta bira mas dificil pa haya y mas caro pa cumpra na California.
E ley aki ta algo cu votadornan a aproba na 2018, cu ta e ‘Farm Animal Confinement Proposition’, cu ta rekeri criadornan di animal traha mas espacio pa porco, galiña, y tambe bishé.
E idea di e ley tabata cu e animalnan mester tin suficiente espacio pa rek nan hala of pianan.
Tin chens cu lo por tin caso den Corte prome cu Januari 2022 yega, pero si esey no socede, e ora California lo por perde casi tur su suministro di carni di porco, y productornan di porco lo bay topa costonan hopi halto pa haya bek e mercado.
Y ya caba awor prijs di Bacon ta subiendo. Na luna di Juni 2021 mes, el a cuminza wordo bendi na 13% mas hopi compara cu un aña prome, cu a bin debi na scarcedad di suministro y tambe costo mas halto di cuminda pa porco.
Costo di Bacon a subi cu 1.8% entre April y Mei, aunke esaki tabata un aumento menos compara cu esun di Maart pa April 2021 ora el a subi cu 3.4%.
Aunke tin scarcedad di Bacon pa come desayuno riba cruseronan di Carnival, toch Heald a bisa claramente cu nan lo no bay ta raciona Bacon. “Nos no ta bay limitabo y bisabo cu ta un pida so bo por haya. Pero si nos sirbi’e tur dia, sigur nos lo keda sin Bacon pa fin di siman,” el a bisa.
El a indica cu e regla nobo aki lo no ta permanente. Pero ta djis algo necesario cu e compania mester haci pa reglamenta e problema aki.
E scarcedad di Bacon lo no impacta e habilidad di Carnival pa tin otro productonan di desayuno abordo. Pues articulonan manera ham y sausage lo bay ta den cantidad suficiente.
E industria crusero apenas recien a habri su portanan pa publico despues di un paralizacion di casi un aña debi na e pandemia. Y a bin haya sa cu huespednan tabata ancioso pa bay vacacion riba lama, y Carnival a confirma cu cantidad di booking a bay sky-high.
Diamars mainta (24 Augustus), un barco di Carnival lo ta di bishita inespera na Aruba, como cu e Tormentanan Tropical y Depresion den Caribe, a pone e barco cambia di rumbo.
