ORANJESTAD (AAN): Pa vakantie grandi aki, e percusionista renombra di Aruba, esta Carlos Bislip ta anuncia cu
e ta ofrece un biaha mas e Drumset and Percussion Camp. E camp aki ta un programa educativo y intensivo diseña pa inspira e siguiente generacion di musico.
Despues cu a introduci e prome edicion di e campamento aki na aña 2009, e camp habri porta pa hopi hoben cu a conoce e mundo profundo di percusion. E impacto y e spin off effect di e proyecto aki tabata asina grandi, cu varios participante a bira musico profesional, y algun a hiba nan talentonan exterior. Awe, tin di nan ta musico profesional y academico na Merca y Hulanda.
Ampliando Horizonte Musical E meta principal di e campamento ta pa duna pueblo di Aruba y tur instancia cu tin e bienestar di nos hubentud na curason, un bista mas amplio di kico e mundo percussion ta. E kier demostra cu percusion no ta limita na drumset, congas, y timbales so. Durante transcurso di 20 dia, e participantenan lo explora un panorama musical rico y varia. E studiantenan lo ricibi entrenamento practico riba Teoria Musical Basico relevante pa e campamento, Snare Drum Basico, Drumset Completo, Percusion Latino y Multi-Pitch reading.
E beneficionan di e campamento ta bay hopi mas aya di habilidad musical. Edicionnan anterior a demostra cu e hobennan a siña traha hunto den un ambiente creativo y structura, unda nan ta desaroya habilidadnan vital pa nan bida diario, manera: Habilidad Social, Colaboracion, Troubleshooting y Liderasgo E campamento aki ta bira posible danki na e apoyo generoso di VNO, Het Cultuurfonds Caribisch Gebied, CEDE Aruba, Lotto pa Deporte, Departamento di Cultura y Cliffix Musical, cu ta comparti e compromiso pa fortalece desaroyo artistico y personal di nos hubentud. Ademas, tin un cantidad limita di beca disponibel pa e campamento.
Detaye di e Campamento y orario, esta cu e lo ta for di 20 di juli te cu 14 di augustus 2026 (un total di 20 dia).
