El a keda deteni
ORANJESTAD (AAN): Tabata Diadomingo atardi laat pa 6:10 pm, cu unidad di Polis di Noord a ser manda rumbo pa area di Fishermans Hut, pa asisti personal di Wardacosta di Caribe Hulandes cu ta dunando un boet e momento ey na capitan di un speedboat.
Ora cu Polis a yega, a nota cu ta trata di dos funcionario di Wardacosta, kendenan ta tratando di traha un procesverbaal contra capitan di un boto, pero e ultimo aki a resulta di no kier duna cooperacion, y tabata logra di huy for di dilanti nan.
Despues a bin haya e speedboat aki riba lama na altura di Fishermans Hut. Ta trata di un speedboat blanco cu geel, y Polisnan a lesa y anota su matricula A-1839, y ta un boto cu turistanan por huur pa sea snorkel of otro actividad riba lama. Riba e boto cu e palabranan grandi “Rent Me”, nan a mira un solo persona, kende ta e capitan.
Na diferente ocasion, personal di Wardacosta a trata di papia cu e Capitan, pero e no tabata razona. Polis tambe a purba, pero tabata envano. E capitan tabata cuminsa dirigi palabranan mahos den direccion di personal di Wardacosta, di e Polisnan, y demas personanan presente. Y keto bay e motor di e speedboat ta cendi, pues e tabata nabega draai rond na forma roekeloos cu esaki rond di e hendenan y botonan cu ta den lama, y pasa hopi cerca di beach. Na diferente ocasion, oficialnan a dune ordo pa e bin na tera, pero e no tabatin oido pa nada di esey.
Polisnan a cuminsa sospecha cu e capitan aki ta bao influencia di alcohol of otro substancia. Esey ta mirando su comportacion, y tambe ora e grita pa papia cu nan, e tin manera un lenga pisa, y ta papia yen di cos bruha den otro.
Algun persona eynan, cu sea ta amigo- of coleganan di e capitan, a keda trata di calma e capitan via nan walkie-talkie, y pa e comporta su mes netchi, pero esey tampoco no a logra.
Dado momento, e capitan a cuminsa ‘trim’ e outboard engine di e boto pa halto, y a manda trot fuerte, di tal forma cu el a spat awa di lama riba tur e hendenan para na oriya, incluyendo autoridadnan. Mientras tanto bolo a cuminsa baha.
Debi na su buracheria, dado momento el a bira su stuur den un mal calculo y pa su malasuerte el a bay dal y pega cu e boto na canto cerca di oriya. Aki personal di Wardacosta a bolbe trata di papia cu e capitan. Pero e capitan a dicidi e ora cu e ta bay start pelea.
Ora cu Polis a mira e pelea aki andando, nan a core bay tambe na e boto, y a bula drenta esaki. Nan a bin haya e capitan ta riba e oficial di Wardacosta den un luchamento y ta purba manda mokete.
Polisnan a trata di wanta e capitan na su brazanan, pero como cu e tabata sigui resisti fuertemente, cu boto basta muha y ta slip, e intento di gare y pone boei na su mannan a bira un tarea dificil.
Despues di hopi rancamento cu pushamento, porfin Polisnan a logra pone su mannan den boei. E capitan a wordo identifica como e homber local di inicial Q. Polis y e hendenan eybanda a keda asombra riba e forma con e capitan a resisti, y por ta indicacion cu e lo tabata bao influencia fuertemente di substancia prohibi. Algun hende na beach a menciona e droga ‘Tusi’, pero esaki no por a wordo confirma.
E sospechoso Q. a wordo aresta pasobra a viola Articulo 2:226, tambe Articulo 2:133, y Articulo 3:52 di Codigo Penal di Aruba, y tambe Articulo 14-A di Ley General di Polis. El a wordo hiba Warda di Polis na Shaba, unda Fiscal Auxiliar a duna ordo pa e keda deteni pa mas investigacion. Posibilidad ta grandi cu Q. lo por bay perde su licencia di nabegacion tambe.
