Ivan Croes, director di DPS:
*DPS no a subi e suma di schoolgeld!
ORANJESTAD (AAN)— Ivan Croes, director di DPS (Departamento Scolnan Publico), a aclarea den entrevista cu DIARIO, cu nan no a subi e schoolgeld pa e siguiente aña escolar y esaki tampoco ta algo cu DPS ta premira cu ta bay sosode.
Esey kiermen mayornan cu tin yiu den scolnan publico por ta trankil cu e tarifa ta mescos cu añanan prome.
Tocante e gastonan cu scolnan tin, Ivan Croes a subraya cu scolnan ta haya nan presupuesto, y nan tin cu traha cune. Enberdad costonan di material escolar a subi, pero cabesantenan di scol tin cu sa con pa maneha e placa cu nan ta haya y percura pa e material drenta pa nan alumnonan haya e enseñanza escolar.
Croes a duna di conoce cu pa e siguiente aña escolar, DPS ta hayando cantidad grandi di peticion. E no sa si esey tin di haber cu e aumento di schoolgeld di SKOA, pero e peticionnan pa cupo nobo ta masha hopi mes.
DPS ta bezig pa wak e cuponan, pasobra con cu bay bin nan scolnan ta basta limita pasobra no tin hopi scol publico, pero nan ta purba wak kico por haci den e caso aki.
Director di DPS a indica cu nan ta purba di mantene e cantidad di klas na 28 alumno, y hasta e sa cu tin preparacionnan tumando lugar pa baha e cantidad di alumnonan pa klas. DPS tin un total di 13 scol y nan ta bay wak con ta bay reparti e cantidad di muchanan aki den e diferente scolnan. Tin alumnonan cu ta inscribi caba pero pa esnan adicional mester bay wak si tin cupo pa nan. Mester premira esaki pasobra no por warda te Augustus, pa evita cu muchanan ta keda sin scol.
Croes a indica cu nan tin scarcedad di un par di docente, pero e problema mas grandi cu nan tin aworaki ta cu nan ta hayando peticion pa gruponan grandi di alumno y pa yuda nan lo mester bin cu extra klasnan tambe.
E alumnonan cu nan tin inscribi cu ta esnan cu tey caba mester sigui nan carera escolar, y logicamente nan tin e “first choice”. E edificionan escolar por ta locual ta bay hunga un rol den e asunto aki, segun Ivan Croes. Nan ta bezig haciendo analisis y pre-inscripcion pa wak cuanto alumno nan tin, pasobra e fluho ta grandi, Croes a reitera. Nan lo mira si mester pone extra modularnan na e scolnan pa wak por si acaso, nan tin cu fit e muchanan aki cu un klas. Director di DPS ta spera cu esey lo no ta e caso y nan lo tin suficiente lugar pa por yuda den esaki. DPS actualmente, ta core den casi 7 mil alumno, anualmente, contando for di scol preparatorio te avanza.
