Darren van Ommeren di SMAC:
ORANJESTAD (AAN): Temporada di Carnaval 71 a cuminza, y Diasabra awor ya caba tin Parada di Flambeu, conoci pa tur hende como ‘Fakkel’. E Parada Grandi na final lo bay ta Diadomingo 2 di Maart 2025.
Den un entrevista cu Darren van Ommeren, president di comision organizacion SMAC, e ta insisti cu Carnaval 71 lo bay ta un continuacion di e celebracion grandi di lustro di 70 aña, y e festeho lo sigui.
El a splica cu awor na 2025, ta bay celebra e di diez aña di existencia di SMAC ta organiza actividad di Carnaval pa Aruba. Ademas di esey tin gruponan cu tambe lo ta den celebracion, e.o. Grupo TOB ta celebrando nan di 25 aña di existencia, e grupo di Robert y su Solo Banda Show ta celebrando 30 aña cu e grupo di Los Laga Bai.
Tambe Empire Carnival Group ta celebrando nan di 10 aña di existencia. Grupo musical NBO ta celebrando tambe nan aniversario. “Tur esey nifica cu tin celebracion extra!”
Un grupo nobo: Segun van Ommeren, e interes di gruponan pa participa den Carnaval ta sigura caba, cu excepcion di Infinity Carnival Group kende desde aña pasa a indica cu nan lo no ta den Carnaval di aña 2025.
El a anuncia cu na lugar di Infinity Carnival Group, ta bin awor un grupo nobo yama ‘Tourist Carnival Group’, cu lo bay den Parada acompaña pa e banda musical Suona. Nan pues ta subi caminda, y ta haci cu e cantidad di grupo parcialmente ta keda mescos, e cantidad di participante kizas lo bira tiki menos, y te cu awor no tin indicacion di esey.
El a splica cu TOB Carnival Group ta bayendo cu 25 seccion, 3 banda, y 2 massa. Darren van Ommeren a indica cu Empire Carnival Group ta bayendo Fakkel cu 2 banda, y Parada Grandi nan tabata bay normalmente cu 1 banda.
Champagne Carnival Group ta baha un tiki den su participacion, y esey tambe a haya su indicacion. Pero e no ta mucho, pues publico lo no ripara e diferencia.
Los Laga Bai ta keto bay stabil cu mesun cantidad di participante.
Cu tur e detaye aki, Darren van Ommeren ta hopi optimista cu Carnaval di Aruba lo bay tin casi mes hopi hende riba pia, y e lo por tin variacion di como 500 pa 750 hende menos. Pero publico lo no ripara esey, debi cu ora bo tin miles di hende riba caminda... claro cu 750 practicamente “ta nada”.
