Francis Toussaint di Brandweer Aruba:
ORANJESTAD (AAN): Relacionista Publico di Brandweer Aruba, señor Francis Toussaint, a declara den un entrevista cu DIARIO cu ultimamente tin un situacion bastante alarmante, unda cu tin un aumento significativo di cas y luganan cu ta pega candela pa diferente motibo. Esaki ta lanta preocupacionnan serio y ta pidi atencion inmediato di henter comunidad.
Señor Toussaint a elabora riba e cantidad di yamadanan cu nan a atende relaciona cu incendio. Den e prome kwartaal di e aña aki, Brandweer a responde na un total di 232 melding, di cual 15 tabata pa edificionan (5 pariba di brug y 10 pabou di brug), mientras cu e resto tabata pa candelanan di cas. Segun Toussaint, e cifra aki ta sumamente alarmante.
Entre e causanan principal, el a menciona problemanan electrico, manera chargernan di telefon cu ta keda conecta riba cama. Su conseho ta pa kita chargernan for di plug ora no ta na uzo pa evita cu nan ta keinta y bira riesgo pa candela.
Un otro factor ta uzo di belanan. E ta conseha pa semper pone belanan den un baki di awa durante ritualnan religioso entre otro, pa preveni cu ora nan caba, nan pega na candela. Tambe mester mantene bela leu di cortina of cualkier material inflamabel.
Ademas, boter di gas cu tin liek ta representa un peligro serio. Toussaint ta enfatisa cu e instalacion di gas mester ta sigur, preferibelmente cu tubo di koper en bes di plastic, pa evita cu nan ta tosta y forma liek y hasta causa explosion. Boter di gas, e ta enfatisa, mester ta pafo.
Finalmente, aparato manera fan y stoof di cushina tambe por causa incendio si no ta wordo manteni adecuadamente. Haci fan regularmente limpi pa preveni cu nan ta keinta y semper verifica cu stoof ta paga prome cu sali for di cas.
Brandweer Aruba ta sigui haci un suplica firme na tur ciudadano pa tuma responsabilidad personal den prevencion. Siguridad no ta un opcion, ta un deber di nos tur. Sea consciente awe y evita desaster mañan, Asina nos ta proteha loke ta mas balioso cu nos tin, nos bida, nos famia y nos hogar.
