Hobennan creativo ta keda promove Aruba Internacionalmente - ORANJESTAD (AAN)- Manera DIARIO a trece dilanti caba, e cantante internacional Mexicano, Thalia,
recientemente a lansa un cancion y video nobo titula ‘Eres Mío’ den colaboracion cu produccion local, hunto cu talento local y sensacion internacional riba Tik Tok, Gilmher Croes.
Talento local, actor y influencer Gilmher Croes tin actualmente mas cu 30 miyon siguidor riba Tik Tok, cu un averahe di mas cu 800 miyon likes riba su contenido. Aña pasa, e cantante internacional Mexicano, Thalia a descubri Gilmher Croes riba Tik Tok anto el a gusta Gilmher su estilo y su contenido.
Thalia a tuma contacto cu Gilmher pa nan asina cuminsa conoce otro, caminda cu e aña aki el a propone pa colabora cu Gilmher den un produccion. Thalia a tuma nota cu e team di produccion di Gilmher ta produci material di calidad hopi halto, pues a propone pa nan traha algo hunto y combina esakinan cu un produccion traha localmente y internacionalmente.
‘Hopi orguyoso, y tin mas pa bin’
Pa logra e proyecto aki mester a bin na un acuerdo cu otro, bini cu e ideanan pa mira kico ta posibel den un temporada caminda mundialmente nos mester a mantene nos mes na regla nan di COVID.
Henter e produccion a tuma lugar na Aruba Ocean Villas den un dia di grabacion. Mi ta hopi agradecido na mi team cu a zorg pa mi luci den e produccion aki “Mi ta super contento pa a yega asina leu di a conecta cu un artista cu den mundo di musica Latino ta un leyenda, mi no tabata sa cu e ta actriz di novela tambe.
E ta nice cu un yiu di tera por cera un conexion asina y traha den un proyecto asina,” Gilmher Croes ta bisa. “E ta mustrando cu nos tambe por, cu rednan social aworaki no tin limitacion, esaki ta un logro hopi grandi pa nos tur.” Gilmher ta remarca cu e sa esaki lo inspira generacionnan nobo pa realisa cu tur cos ta posibel, cu bo tin cu djis bay p’e. “Nos ta hopi hopi orguyoso, y tin mas pa bin,” Gilmher ta expresa.
E vision ta hopi grandi y sin duda lo logra hopi mas segun Gilmher ta comenta. Gilmher: “Danki tambe na tur hende cu ta kere den nos y cu semper a sostene nos. Nos ta bay sigui cana nos caminda y nos lo sigui logra, pasobra nos tur tin vision grandi, nos tur ta kere den nos mes y nos kier demostra cu tur cos ta posibel.”
E team local cu a traha riba e proyecto aki tabata Gilmher Croes, Michael Fowler, Ken Wolff, Natalie Manzanares, Diana Laclé, Marc-Anthony Pablo, Mike Karg, Jayden Croes, Gilean Hoek, Laura Kock, y Desi Hernandez.
Palabranan di gradicimento ta bay na henter e production team, Aruba Ocean Villas, Osyth Henriquez y Jonathan Vieira.
