Omicron no ta causa perdemento di olfato ni smaak
ORANJESTAD (AAN) – Den su programa “Hablemos de Salud” cu dr. Luis Pacora ta presenta via su site online, el a menciona cual ta e sintomanan di e variante Omicron, di acuerdo cu e declaracion di dra. Angelique Coetzee, ken a descubri e variante aki na Sudafrica.
Pacora ta splica cu Omicron no ta causa perdemento di olfato ni smaak, pero si ta genera keintura leve, dolor y grawatamento di garganta, tosamento seco, y agotamento extremo, cu ta e sintoma di mas pisa. Te aki, e docter ta subraya, no ta parce cu e ta hopi grave, pasobra e pashentnan cu a haye na Sudafrica y na Merca unda a detecta e prome caso e siman aki, ta recuperando caba, no obstante e ta wordo considera un variante di preocupacion, manera ta conoci, debi na e cantidad di mutacionnan cu e tin.
Segun Pacora Camargo, cu ta miembro di e Asociacion di Docternan di Peru, ainda e cientificonan ta studiando e caracter di e variante aki, y no por bisa ainda te unda e por yega cu por afecta atrobe henter humanidad, pero locual e ta mira como positivo, ta cu e variante aki ta kita e variante delta for di caminda.
El a haci enfasis cu segun e informacionnan cu e ta compilando tocante e variante aki, mayoria di e personanan cu a haye na Sudafrica, no tabata vacuna, y otronan tabata tin un of ambos vacuna, y te ainda no tin registro di mortalidad debi na dje, pero tampoco por descarta cu esaki por sosode na dado momento, teniendo cuenta e diferente factornan cu ta regarda cada persona mes, mescos cu den e caso di Covid-19 den su version original.
Ainda e expertonan ta investigando si e vacunanan existente ta eficaz of no pa combati Omicron.
Riba e imagen adhunto, por mira e paisnan unda e variante nobo a wordo detecta. Potret cortesia di NY Times.
