Raiz no tabata sa cu Geoffrey Wever no tabata tey pa keda y unda e lo bay?
- Yiu di delincuente Sevinger mester reemplaza su tata den Parlamento pa AVP?
- Raiz a kibra coalicion y uni cu Benny pa deshaci di man fuerte di Vrolijk
ORANJESTAD (AAN): Matutino DIARIO for di 2023 a anuncia na su lectornan cu e campaña electoral di 2024 lo a bira uno cu lo por tabata fuerte, debi na e logronan grandi y historico cu Gabinetenan di Evelyn Wever-Croes a entrega na Aruba y cu ta dificil pa contrincantenan politico kibra.
DIARIO tabata na haltura cu cualkier momento un bom por rementa, ora partido RAIZ a crea un motibo completamente contra tur palabracion di coalicion cu partido MEP, cu partido RAIZ no ta acepta e man fuerte di mr. Edgar Vrolijk cu a pone reglanan pa subi e calidad di Parlamento cu DIARIO mes durante tanto tempo a critica.
Sumanan enorme di Pueblo ta bay pa percura pa un bon funcionamento di Parlamento, cu a cay completamente den prestigio durante e ultimo añanan pa motibo di e presencia di Benny Sevinger prome como acusado y despues como delincuente condena dor di Huez y Corte Superior den e representacion oficial di Pueblo di Aruba, cu ta Parlamento.
Raiz tabata uno di e partidonan cu a bay contra presencia di Benny Sevinger den Parlamento, pero finalmente a uni cu Benny Sevinger den Parlamento pa asina a pone un fin na Gabinete Evelyn Wever-Croes 2.
Raiz a crea un crisis den Parlamento sabiendo cu esaki lo conduci na caida di Gobierno Wever-Croes.
Partido Raiz, cu a crece pa motibo cu como partido chikito e por a traha den un Gabinete Evelyn Wever-Croes cu a haya aplauso pa e forma cu den e coalicion anterior el a atende cu e prome fase di recuperacion di Aruba despues di e desastre total cu partido AVP a crea cu situacion financiero y e scandal di Benny Sevinger.
E forma cu mr. Evelyn Wever-Croes a exigi semper respet pa e base moral di Aruba, a sostene un maneho na nivel di moral di e Pueblo di Aruba.
Informantenan awe ta lansa e pregunta pakico Raiz, cu tabata tin un compromiso di gobernacion cu MEP, a crea un conflicto pasobra no tabata acepta mr. Edgard Vrolijk como Presidente di Parlamento pasobra Vrolijk no tabata acepta mas cu Parlamento di Aruba tabata wordo transforma den un teatro di mal gusto caminda placa di Pueblo ta percura no solamente pa snacks y cuminda di restaurant, pero tambe pa sosten di expertonan ora Miembronan di Parlamento mester a haci nan trabou.
RAIZ a uza e oportunidad ora segun palabracion concreto mester a prolonga presencia di mr. Vrolijk como Presidente di Parlamento y RAIZ hunto cu Benny Sevinger y otro miembronan di oposicion, a apunta candidato di Raiz como Presidente di Parlamento, sabiendo cu esaki sigur lo a causa un conflicto.
Pakico Raiz kier a baha Gobierno na un forma directo? Esaki ta e pregunta cu awor ta bini dilanti y segun informantenan tin dos contesta.
Na prome lugar ta bini e respet y sosten cu dirigentenan di MEP tabata ricibi pa e enorme labor cu nan a realiza den Gobierno di Aruba cu a bira modelo den Reino.
Pues Raiz no a logra pone su mes na e nivel di MEP. Na segundo lugar a bini cu mester tene cuenta cu for di e tempo mester tabata tin tur indicacion cu mr. Geoffrey Wever no tabata tin intencion pa keda den RAIZ y ya probablemente ya tabata tin contacto cu e partido nobo di mr. Gerlien Croes, cu tabata FUTURO na cual mr. Geoffrey Wever a uni su mes.
Den e caso di Glenbert Croes, Prome Ministro Evelyn Wever Croes a para sumamente fuerte pa su principionan, cu el a mantene.
Na caminda pa eleccion Prome Ministro mr. Evelyn Wever-Croes a sigui crece hunto cu su partido, na momento cu otro situacion diferente ta presenta.
Mientras investigacionnan cu ta tuma lugar no ta duna informacion concreto di delincuencia di parti di Endy Croes y te awor ta papia di un suma di Mil Florin cu a wordo paga na su ruman muher pa make up na eventonan, ta wordo trata dor di e alianza nobo contra Prome Ministro, pa uza lazo personal entre Prome Ministro y Endy Croes pa destrui mr. Evelyn Wever-Croes politicamente..
Uno di e personanan cu ta duna su sosten como Miembro di Parlamento den e caso aki, ta Benny Sevinger, cu ta Miembro di Parlamento di Aruba, caminda e no por regresa despues di eleccion riba orden di Huez.
A manda busca yiu di Benny Sevinger for di Hulanda, interumpiendo su estudio pa reemplaza Benny Sevinger riba lista di AVP.
Un asunto serio cu ta wordo cuestiona den publico cu no ta comprende pakico yiu di un politico, condena na prison pa corupcion, mester ta representa dor di su yiu riba lista di partido AVP.
Un situacion sumamente serio ta presenta su mes riba tereno politico di Aruba, caminda informantenan ta papia di hasta un complot pa destrui bon nomber di Prome Ministro Wever-Croes.
DIARIO ta traha duro pa verifica e informacionnan cu ta drenta na un momento cu tur indicacion ta cu Aruba ta duna sosten total na Prome Ministro Wever-Croes pa continua cu e maneho cu el a hiba na Aruba y cu mundo ta aplaudi.
