Vocero di BCI, Robby Rosel:
*E accion di limpieza aki ta core di 2 di September te 16 di December
ORANJESTAD (AAN) – Baki den bario ta bay cuminza hunto cu e campaña “Limpi Limpi” y ta cuminza cu un accion di limpieza pa cuater luna largo, y cu lo inicia dia 2 di September y lo termina dia 16 di December. Asina e vocero di Bureau City Inspector a informa den entrevista cu DIARIO.
“Nos ta bay tey pa stimula y tambe trece na e comunidad di Aruba, mustra nan con nan por haci uso di e bakinan di sushi y tambe siña nan con pa separa cada desperdicio, pa asina wordo tira den un baki, pasobra den futuro tambe Aruba lo bay introduci e separacion oficialmente, unda nos ta bay separa locual ta plastic, glas, carton, etc. Tur e separacionnan aki tambe ta bay bin pronto, y tambe pa mata y desperdicio di cas ta bay tin baki unda diferente compania di baki a uni hunto cu nos, di Bureau City Inspector y Ministerio di Medio Ambiente, p’asina nos por trece esaki pa dilanti”, Robby Rosel a indica.
El a reitera cu e accion aki ta cuminza Diasabra di e siman aki, esta dia 2 di September, y City Inspector lo ta tur caminda rond di Aruba, cuminzando den e Distrito di San Nicolas. El a reitera cu ta bay tin baki pa desperdicio di cas, pero mester zorg pa separa nan; tambe ta bay tin baki pa mata, ademas di baki pa bloki, piedra, etc. Y locual ta hopi importante ta cu algun compania lo tey pa locual ta articulonan bieu manera: airco, frishider, set di sala pa benta afo, heronan, artefactonan electronico tambe pa benta afo; pues, ta bay tin bakinan disponible pa esakinan.
Un City Inspector lo bay ta na cada entrada di e actividad aki cu lo dirigi e autonan pa drenta unda ta e bakinan disponible pa tira desperdicio. Ta bay tin un entrada y un salida e mainta aki. Serlimar tambe lo ta presente pa e personanan cu mester di un baki di sushi pa nan inscribi.
