Rulienne Arends, Trahado Preventivo di FADA:
ORANJESTAD (AAN) – Fundacion Anti-Droga Aruba ta hopi contento cu nan campaña “BAR, Bo amigo responsabel” a sali cu bon pia den comunidad, cual ta dirigi pa hendenan bebe concientemente.
Rulienne Arends, Trahado Preventivo di FADA, a comenta den entrevista cu DIARIO cu nan a lanza e campaña di “BAR Bo Amigo responsabel”.
Arends a bisa cu e acogida ta super bon eyfo, ta hopi positivo, por wak e den e reaccion di tur hende cu e campaña ta yegando cerca nan, y e ta algo cu FADA ta agradici cu ne.
Awo, cu e fin di simannan ta biniendo tras di otro, den tur e diferente paradanan, di esun di mas chikito te na e adultonan, ta bay pone cu “BAR” ta bay ta mas fuerte ainda, pa loke ta e marketing cu ta loke ta yuda e campaña aki.
“Sigur nos ta bay tin tur siman un video cu ta bay sali cu personanan conoci den e temporada di carnaval, mandando nan mensahe pa recorda tur hende di ‘Bo amigo responsabel” y KPA tambe ta hopi bon den e parti aki di concientiza tur hende, cu sigur nos ta bay ta hopi fuerte den e fin di simannan cu ta bin”, Rulienne Arends a duna di conoce.
