E devocion riba Caminda di Cruz ta basicamente un momento pa medita riba Pasion y Morto di nos Señor Jesus Cristo.
Esaki pa medio di e diescuatro cruznan di palo cu imagen den forma di relieve of pinturanan cu tin den tur Misa Catolico, poni riba muraya, pa representa varios di e escenanan cu nos Señor a biba na caminda pa Monte Calvario. Pero e historia completo ta aparece den Bijbel.
PROME STASHI- JESUS TA WORDE CONDENA CU MORTO
Nos ta adora Bo Cristo Jesus, y nos ta bendiciona Bo Cruz Santisimo, pasobra danki na dje Bo a redimi e mundo.
ORACION:
Y despues cu mainta a habri, y cu e principenan di e sacerdotenan a reuni pa delibera hunto cu e ancianonan, escribanan y henter e Conseho, Jesus a worde mara, presenta y entrega na Pilatus.
Contal di tene su pueblo contento, Pilatus a libera Barabas manera nan tabata kier, y a entrega Jesus pa E worde sacrifica den e Monte Calvario.
Bendiciona sea e Pasion y Morto di Nos Señor Jesus y e dolornan cu su Santisima Mama Maria, a padece.
Nos tata, Ave Maria y Gloria.
DI DOS STASHI- JESUS TA CARGA SU CRUZ
Nos ta adora Bo Cristo Jesus, y nos ta bendiciona Bo, pasobra cu Bo Santisimo Cruz Bo a redimi mundo.
ORACION:
Salve Rey di nos! Bo a compadece di nos foutnan; obediente na Bo Tata Bo a wordo crucifica manera un lamchi keto cu ta wordo hiba pa mata na abatoir. Na Abo tur Gloria, Hosana, na Bo e triunfo di victoria. Na Abo e corona di sumo alabanza y di sumo honor.
Nos ta alaba e Pasion y Morto di nos Señor Jesu Cristo y e dolornan di su Mama Santisimo.
Nos Tata, Ave Maria y Gloria
DI TRES STASHI:JESUS TA CAY PA PROME BIAHA CARGANDO SU CRUZ
Nos ta adora Bo Cristo, y nos ta bendiciona Bo, pasobra cu Santisimo Cruz bo a redimi mundo.
ORACION:
Nos Señor Jesu Cristo a humiya su mes door di ta obediente te su morto riba Cruz. Pesey tambe Dios a glorifik'E y dun'E un nomber superior na tur otro nomber. Laga nos bin ador'E. Laga nos hinca rudia yorando den presencia di e Señor cu a crea nos, pasobra E ta nos Señor, nos Dios.
Nos ta alaba e Pasion y Morto di nos Señor Jesu Cristo y e dolornan di su Santisimo Mama.
Nos Tata, Ave Maria.
DI CUATRO STASHI: JESUS TA TOPA CU SU MAMA
Nos ta adora Bo Cristo, y nos ta bendiciona Bo
pasobra cu Bo Santisimo Cruz Bo a redimi mundo.
ORACION:
Cu ken mi por compara Bo, of kico ta similar na bo, oh Yiu di Jerusalen? Pasobra bo tribulacion ta grandi, mescos cu lama. Pober Mama tristo! Un spada a traspasa bo alma abati pa e dolor.
Nos ta alaba e Pasion y Morto di nos Señor Jesus Cristo y e dolornan di su Santisimo Mama.
Nos Tata, Ave Maria y Gloria.
DI CINCO STASHI: SIMON DI CIRINE TA YUDA JESUS CARGA SU CRUZ
Nos ta adora Bo Cristo, y nos ta bendiciona Bo
pasobra cu Bo Santisimo Cruz Bo a redimi mundo.
ORACION:
Na caminda, nan a topa cu un homber natural di Cirine, yama Simon, ken a worde obliga pa yuda Jesus carga su Cruz.
Nos ta alaba e Pasion y Morto di nos Señor Jesus Cristo y e dolornan di su Santisimo Mama.
Nos Tata, Avemaria y Gloria.
DI CINCO STASHI: JESUS TA TOPA VERONICA
Nos ta adora Bo Cristo, y nos ta bendiciona Bo
pasobra cu Bo Santisimo Cruz Bo a redimi mundo.
ORACION:
Nos a mir'E despues desprecia, baron di dolor, y su Santo rostro cubri pa berguenza y ofensa, a keda marca den e manto di Veronica.
Asina tambe Su aspecto ta parce sin gloria dilanti hende, y na un forma despreciable entre e yiunan di hende.
Sinembargo "Bo ta esun di mas gentil den buniteza, den henter e yiunan di hende, y danki na Bo heridanan nos a worde sana".
Nos ta alaba e Pasion y Morto di nos Señor Jesus Cristo, y e dolornan di su Santisimo Mama.
Nos Tata, Ave Maria y Gloria.
DI SIETE STASHI: JESUS TA CAY PA DI DOS BIAHA
Nos ta adora Bo Cristo, y nos ta bendiciona Bo
pasobra cu Bo Santisimo Cruz Bo a redimi mundo.
ORACION:
Jesus: "Nan ta trata mi mescos cu un bichi, y no manera un hende; asina ta e oprobio di hendenan y e desecho di e turbanan.
Tur esnan cu mira Mi ta haci bofon di Mi cu palabra y cu movecion di cabes".
Nos ta alaba e Pasion y Morto di nos Señor Jesus Cristo y e dolornan di su Santisimo Mama.
Nos Tata, Ave Maria y Gloria.
DI OCHO STASHI: JESUS TA PAPIA CU E HENDENAN MUHER
Nos ta adora Bo Cristo, y nos ta bendiciona Bo
pasobra cu Bo Santisimo Cruz Bo a redimi mundo.
ORACION:
Tabata sigui'E un muchedumbre enorme, di e pueblo en general y specialmente hendenan muher, kendenan tabata yora hopi y lamenta.
Pero Jesus a bira wak nan y a bisa nan: "Yiunan di Jerusalen, no yora pa Mi; pero yora pa boso mes y boso yiunan".
Nos ta alaba e Pasion y Morto di Nos Señor Jesus Cristo, y e dolornan di su Santisimo Mama.
Nos Tata, Ave Maria y Gloria.
DI NUEBE STASHI: JESUS A CAY PA DI TRES BIAHA
Nos ta adora Bo Cristo, y nos ta bendiciona Bo
pasobra cu Bo Santisimo Cruz Bo a redimi mundo.
ORACION:
Mi pueblo stima, kico mi a haci bo? Di ki forma mi a ofende bo? Pasobra mi a hiba bo pafo di e tera di Egipto bo a prepara un cruz pa bo Salvador?
Mi a alimenta bo cu mana den e desierto; anto abo ta dal mi un bofta? Kico mas mi mester a haci pa bo, di locual mi a haci caba?
Nos ta alaba e Pasion y Morto di nos Señor Jesus Cristo y e dolornan di su Santisimo Mama.
Nos Tata, Ave Maria y Gloria.
DIEZ STASHI: JESUS TA WORDE DESPOHA DI SU PAÑA
Nos ta adora Bo Cristo, y nos ta bendiciona Bo
pasobra cu Bo Santisimo Cruz Bo a redimi mundo.
ORACION:
Ora nan a yega e lugar cu yama Golgota, cu ta nifica "lugar di Calvario", nan a dun'E biña mezcla cu miel, ma El despues di a purbe, no kier a sigui.
Despues cu El a worde crucifica, nan a parti su pañanan entre nan mes, na rifa. Cu esaki a worde cumpli cu e profesia cu ta bisa: "Nan a parti entre nan Mi pañanan, y nan a rifa Mi tunica".
Nos ta alaba e Pasion y Morto di nos Señor Jesus Cristo, y e dolornan di su Santisimo Mama.
Nos Tata, Ave Maria
DIESUN STASHI: JESUS TA WORDE CLABA RIBA CRUZ
Nos ta adora Bo Cristo, y nos ta bendiciona Bo
pasobra cu Bo Santisimo Cruz Bo a redimi mundo.
ORACION:
Ora nan a yega na e lugar yama Calvario, eynan nan a crucifique; y hunto cun'E dos ladron: un na banda drechi, otro na banda robes, kedando Jesus mey mey di nan.
"Mi pueblo stima, kico mi a haci boso? Mi a eleva bo cu virtudnan grandi, y bo ta colga mi den e patibulo riba Cruz".
Nos ta alaba e Pasion y Morto di Nos Señor Jesus Cristo y e dolornan di su Mama Santisimo.
Nos Tata, Avemaria y Gloria.
DIESDOS STASHI: JESUS TA MURI RIBA CRUZ!
Nos ta adora Bo Cristo, y nos ta bendiciona Bo
pasobra cu Bo Santisimo Cruz Bo a redimi mundo.
ORACION:
Despues cu Jesus a mira su mama y su discipulo cu E tanto a stima, ken tabata t'ey Jesus a bisa su mama: "Muhe, ata aki bo yiu", y despues a bisa su discipulo: "Ata aki bo mama".
Jesus, ken a bebe vinager a bisa: "Tur cos a worde cumpli".
Anto El a exclama cu stem hopi halto, bisando: "Mi tata stima, den bo man Ami ta encomenda Mi Spirito", y bisando e palabranan aki El a expira.
Nos ta alaba e Pasion y Morto di nos Señor Jesus Cristo, y e dolornan di Santisimo Mama".
Nos Tata, Avemaria, y Gloria.
DIESTRES STASHI: JESUS TA WORDE BAHA FOR DI E CRUZ
Nos ta adora Bo Cristo, y nos ta bendiciona Bo
pasobra cu Bo Santisimo Cruz Bo a redimi mundo.
ORACION:
Oh, bosonan, cuanto di boso ta pasa riba e caminda aki!
Atende y considera si tin dolor manera esun di Mi.
Mi wowonan a bira ciego di tanto cu nan a yora; mi entrañanan a estremece; mi curazon a drama riba tera y mi a mira e morto cruel di mi Yiu, pues e enemigo a triunfa!
No yama mi Noemi (kiermen gracioso), pero yama mi Mara (cu ta nifica amarga), pasobra Esun Todopoderoso a yena mi di gran amargura.
Nos ta alaba e Pasion y Morto di nos Señor Jesus Cristo, y e dolornan di su Santisimo Mama.
Nos Tata, Avemaria y Gloria.
DI DIESCUATRO STASHI - JESUS TA WORDE SEPULTA
Nos ta adora Bo Cristo, y nos ta bendiciona Bo
pasobra cu Bo Santisimo Cruz Bo a redimi mundo.
ORACION:
Tumando e Curpa di Jesus, Jose a lor'E den un paña limpi, y a pon'E den un graf cu el a traha p'e, y cu el a laga habri for di un piedra, cual tabata sin uso te ainda. Y halando un piedra grandi, a cera e entrada na e sepulcro.
Nos ta alaba e Pasion y Morto di Nos Señor Jesus
Cristo y e dolornan di su Santisimo Mama.
Nos Tata, Avemaria y Gloria
ORACION FINAL:
Señor Dios, cu a laga e señalnan di Bo Pasion pa nos, den e paña Santo den cual Bo Santisimo Curpa a worde lora, ora cu Jose a baha Bo for di e cruz; concede nos oh piadosisimo Señor! cu pa Bo morto y sepultura, y pa Bo dolornan y di Bo santisimo Mama, e almanan di Purgatorio worde hiba na e Gloria di Bo Resureccion, unda Abo ta biba y reina, hunto Dios Tata, den unidad di Spirito Santo, pa tur siglo di siglonan, Amen.
