Mester evita problema di salud durante temporada di vacacion 2024
*Alcohol y calor ta productor di enfermedad y fayo total di organo vital
ORANJESTAD (AAN) — Juli 2024 a haci su entrada y ta anuncia cu Aruba a drenta e loke ta conoci como temporada di vacacion grandi.
Un bida mas relaha, cu mas participacion social den circulo familiar y di amigonan ta bay acompaña pa mas actividad na aire liber y sigur na beachnan di Aruba, cu lo atrae mas turista tambe.
Na 2024, sinembargo, mester prepara pa gastonan mas halto riba diferente tereno, debi na e impacto di cambio di clima, cu ta exigi pa hende cuida su salud.
Responsabilidad propio pa salud, ta wordo exigi mas cu nunca na 2024, cu a presenta e fenomeno natural cu a haya nomber di Horcan Beryl, cu a splica henter mundo cu naturaleza a conoce cambionan grandi.
Pa Horcan Beryl for di inicio di Juli por a move riba Oceano Atlantico sin estorbo y problema y drenta region di Caribe como un sistema cu por considera record, laman mester tabata sumamente cayente.
Laman cayente ta duna prueba di un solo inclemente, di grado halto di calor cu por crea problema di salud enorme pa hende.
Na 2024, disfruta di beach na un forma responsabel, mester encera cu hende no ta expone su mes na e peliger cu calor ta crea, pero cu hende tanto na beach como na otro lugarnan calor, ta percura bebe suficiente awa na forma continuo.
Na mes momento mester reduci e consumo di alcohol na sitionan calor y sigur si kier drenta of subi laman.
Consumo di bebida alcoholico na beach ta haci dificil pa curpa di hende regula su temperatura. Esaki por provoca malestar pero tambe condicionnan mucho mas serio cu resultado fatal.
Un persona cu ta goza cu un bon condicion di salud, por wordo afecta seriamente dor di exposicion na calor peligroso mas ainda si e ta bebe alcohol.
Den e pakete di gastonan total pa e temporada di vacacion 2024, tur ciudadano mester ta prepara pa aumento di uzo di awa y coriente, cu ta elemental pa por sobrebibi e condicionnan di tempo, cu Aruba lo conoce generalmente den e proximo lunanan.
Informacionnan cu DIARIO a busca pa presenta na su lectornan, ta mustra cu mester spera dianan calor, cu ta haci cu no por keda exponi na solo demasiado largo.
Calor lo reina naturalmente tambe na casnan, cu lo mester gasta mas coriente pa fan y airconditioning.
Pueblo mester prepara su mes pa e gastonan aki y dicidi pa su mes awor kico e kier pa su bienestar.
Informantenan di DIARIO tur a mustra cu den e proximo lunanan, cambio di clima lo produci momentonan di calor extremo, cu ta afecta salud di hende.
Mayornan mester evita cu muchanan ta expone nan mes na peligronan cu e condicionnan di clima calor por crea y regularmente asegura nan mes cu e muchanan ta bebe suficiente awa.
Cu entrada di e temporada di vacacion, hende kier disfruta di tur loke ta haci bida mas placentero.
Durante e temporada di vacacion 2024, sigur na Aruba cu a wordo bendiciona cu un nivel di bida sumamente halto, e presupuesto y plannan familiar mester tene e condicionnan di clima central.
DIARIO lo presenta tur informacion necesario pa guia su electornan.
