Omicron ta tranca biahenan y afecta servicionan basico na tur pais --- Covid-19 a bira un pagara cu por rementa cualquier momento --- Clapchi ta rementa y hende ta nenga di entrega ambiente di fiesta
ORANJESTAD (AAN)- Kico ta bay pasa den e proximo dianan? Ningun hende tin e contesta realmente mientras Omicron ta conkista mundo, cu ta prepara pa un cambio di 2021-2022 historico.
Na tur pais filanan largo ta forma mientras hende ta dicidi pa vacuna of pa booster pa asina por enfrenta e diferente variantenan di e coronavirus nobo, cu ta ataca hende.
Na varios pais e variante Omicron a cuminsa domina pero na varios pais ainda, ainda tin casonan di e prome dos variante y di Delta.
Mundo medico ta na careda pero tambe gobernantenan y empresarionan, cu mester tuma decisionnan mientras un grupo grandi di trahador tin problema pa deshaci completamente di tradicion y costumber y kier keda optimista pa e peliger di e virus, aunke 31 di December ta acerca.
Cu mundo ta drenta un fin di aña historico no solamente ta un asunto di presencia di un pandemia, pero a cuminsa bira un asunto di e forma cu hende kier atende cu e pandemia.
Na 2020, ora ainda mundo tabata en espera di e vacuna, bista di hende tabata fiha riba e momento cu e por bandona e situacion di pandemia y hasta bolbe na normalidad na 2021.
Esaki no a socede y na momento cu mundo a cuminsa recupera, Omicron a anuncia su yegada cu un velocidad enorme.
Esaki hustamente ta e problema pa personal di entre otro Cuido Medico, pero sigur pa empresanan y gobiernonan rond mundo cu ta wordo confronta cu situacionnan explosivo prome cu mundo cientifico por duna contesta concreto riba Omicron.
Loke si ta sigur ta, cu e problema di Omicron ta, cu el a bira mas invisibel cu nunca.
Un factor cu sigur ta hunga un papel den e peliger mas grandi di Omicron compara cu Alpha, Beta y Delta, ta e hecho cu e ta plama rapidamente y sigur cerca un grupo grandi di mucha y hoben, no ta duna ni sikiera e prueba visibel cu el a ataca.
Esaki ta e motibo cu mundo a cuminsa papia atrobe di cuarentena pa trata na para e progreso di e malesa, cu ta mortal ainda pa un cantidad di persona cu no ta vacuna y sigur tin un problema medico ademas di e hecho cu nan no tin proteccion.
Hende ta nenga di acepta e realidad di Omicron, mientras mundo a parce di ta perde control riba su realidad.
Ayera cantidad di buelo a wordo cancela rond mundo, cu a cuminsa cende clapchi, cuminsa pone boter di bebida cla pa brindis, mientras medico tabata adverti cu e malesa no ta duna tanto dia di anuncio di su yegada y no ta tuma dianan pa pasa di un pashent pa otro.
Serrvicionan basico na hopi pais ta na peligro debi na e hecho cu personal contagia ta crea un cadena pio cu pagara.
Na momento cu Omicron drenta, e cantidad di personal cu mester keda cas ta aumenta.
Hopi compania y Gobierno ta lomba contra muraya mientras ta wordo calcula cu na Januari 2022 mundo realmente lo sinti e efectonan grandi cu e actual ola di e Coronavirus nobo lo provoca.
