Na momento cu Inglatera ta tuma medida severo contra imigracion
*Cambio den comportacion electoral hancra den base formacion
*Hulanda ta despedi awe di e constelacion bieu di Tweede Kamer
ORANJESTAD (AAN) — Generalmente 5 di December ta dia cu Sinterklaas tin tur atencion.
Awe, sinembargo, no ta Sinterklaas lo ta central den atencion di e Hulandes, pero e cambio grandi cu ta manifesta su mes den e Parlamento di Hulanda, caminda awe ta tuma despedida di un cantidad di politico cu durante e eleccionnan na 2021, tabata conoci cu e turbulencia riba tereno politico Hulandes, awe ta culmina.
Awe ta e dia cu oficialmente Hulanda ta despedi di e ultimo constelacion di Tweede Kamer, cu a duna un sosten enorme na Gabinete Mark Rutte 4.
Awe ora e Parlamento Hulandes reuni, e lo discuti e credencialnan di e miembronan nobo di e representacion oficial di Pueblo Hulandes, Tweede Kamer.
Si e partido mas grandi den e constelacion nobo di Tweede Kamer, cu ta e fraccion di PVV di Geert Wilders, haya loke e kier, den futuro Tweede Kamer lo ta e unico representacion di deseo di Pueblo nacional, na forma directo of indirecto.
E partido di Geert Wilders no ta kere cu mester di Eerste Kamer y esaki ta uno di e hopi cambionan cu politica Hulandes lo conoce den e termino nobo.
Por lo pronto awe ta bira e dia cu ta cera porta pa fraccionnan cu ta mira cambio importante den mayoria di caso den e cantidad di representantenan cu nan tabata tin te awor.
Eleccion 2023 tabata sumamente cruel cu e politiconan cu a tuma nan asiento na 2021, ora ya tabata tin tur indicacion cu cambio lo a bati na porta ora ya e raiz tabata presente pa Omzigt a yama su partido bieu CDA ayo, pero tambe Caroline van der Plas lo a mira un crecemento enorme di e partido BoerBurgerBeweging, cu no a alcansa absoluto cu el a pensa pa motibo cu Omzigt a bati na porta y Geert Wilders a bay cu victoria electorial.
Cu despues di awe por spera cambio den e pasonan di Gobierno y den Parlamento ta bira evidente ora pa ultimo biaha e constelacion di Tweede Kamer reuni.
