ORANJESTAD (AAN): Tin speculacionnan relaciona cu e edad di pension den cuadro cu e acuerdonan cu Gobierno di Aruba y Hulanda tin pa loke ta e sosten financiero.
Premier Evelyn Wever-Croes a indica cu manera tur hende sa, aña pasa e pandemia di Covid-19 a afecta mundo henter y tambe Aruba. Pesey tabata hopi dificil pa por a yega na fondonan ya cu no tabata tin entradanan y e turistanan a bay.
Esey a pone cu Gobierno di Aruba mester a pidi ayudo di Hulanda. Hulanda a pone algun condicion y cu Aruba mester bay di acuerdo cu un lista di condicionnan cu ta poni den e Landspakket.
Un di nan ta edad di pension. Prome Hulanda tabata kier pa Aruba bay di acuerdo y aumenta edad di pension. A negocia e punto aki y e palabracion ta cu pa fin di e aña aki inicio di otro aña ta bay haci un investigacion con fuerte e fondo di pension ta.
Edad di pension subi of baha ta depende riba con fuerte e fondo ta. Si e fondo ta fuerte, por baha e edad di pension pasobra tin mas placa pa paga e extra pensionnan cu ta bin si baha e dad, e mandatario a splica.
Si baha e edad di pension mas hende tin cu bay haya pension. Si hisa edad di pension, menos hende ta bay haya pension y asina por haci e fondo mas fuerte, a remarca.
A palabra cu Hulanda cu ta bay haci un investigacion y esaki ta bay mustra con fuerte e fondo di pension ta y a base di esey ta bay dicidi si mester hisa edad di pension si of no.
Wever-Croes a indica cu a palabra tambe cu Hulanda, pasobra na Aruba edad di pension ta halto caba cu 65 aña, ta pa bin cu algo flexibel. Esun cu kier baha prome por baha prome y esun cu kier traha mas añanan por sigui traha un poco mas.
Pero pa aworaki ta palabra cu Hulanda cu lo haci un investigacion prome pa mira con solido e fondo di pension ta y si yega na e conclusion cu e fondo ta solido no tin mester di aumenta e edad di pension.
Ningun caminda ta para cu ta bay aumenta e edad di pension. E palabracion ta cu ta bay haci un investigacion prome y e ora lo informa comunidad kico ta e resultadonan di e investigacion.
Pa haci un cambio tin cu yega na un acuerdo cu e sindicatonan, e mandatario a enfatisa.
