Bon sincronisacion den Reino Hulandes mester evita drama
- Mester sincronisa plan nobo pa Hulanda cu Parlamento Aruba
- Bida di ser humano na disputa den situacion actual di adopcion
ORANJESTAD (AAN) Cu ta e parha grandi ta entrega baby , tabata e storia cu tabata base pa splicacion na mucha di e forma con un hende ta haci su entrada na mundo.
Informacion cu DIARIO ta sigui ricibi y parcialmente a haya atencion di DIARIO algun siman pasa, ta indica cu awor mundialmente e forma cu mucha ta yega mundo, conoce un cambio creciente cu ta motibo di basta preocupacion.
E hecho cu tin hopi mucha na mundo cu ta nace bou circumstancianan fastioso, a habri caminda pa un crecemento serio di adopcion di mucha dor di parehanan cu kier amplia nan familia.
Agencianan di adopcion na e momentonan aki, segun informantenan importante ta mustra DIARIO, ta representa un negoshi den cual e persona cu tin placa pa pone riba mesa, tin un oportunidad internacional tremendo pa por adopta un mucha, cu lo conoce un cambio di bida cu na cantidad di pais na e momentonan aki ta bira un problema serio.
Mientras subi avion y bay regla pa bolbe cu un baby na un pais, ta birando un forma pa parehanan yama nan mes mayor den un cantidad di caso cu ta crece enormemente y hasta ta wordo considera un parti di comercio, e cantidad di hobennan cu ta pasa den problemanan serio ta aumenta tambe.
Na mes momento por nota, con hobennan na momento cu nan alcansa un edad cu nan por tuma nan propio accion, ta cuminsa haci investigacionnan pa asina nan determina kende ta nan mama y tata natural.
Un situacion serio awor ta haya atencion politico sigur na Hulanda, manera DIARIO a trece dilanti ora DIARIO a priminti cu e ta sigui busca mas informacion, loke a socede tambe.
Informacionnan ricibi di e plataforma internacional, segun informantenan ta haci necesario, pa Aruba cuminsa sincronisa su maneho di adopcion cu Hulanda, caminda manera ya DIARIO a informa, a duna inicio na e proceso legal pa yega na cambio di e leynan di adopcion.
Manera ta bini dilanti den combersacionnan cu DIARIO a hiba, sigur ta importante pa Aruba sincronisa e asunto y desaroyonan aki cu mundo politico Hulandes, pa asina atende un problema cu na Aruba tambe ta alcansa proporcion significante.
Na Hulanda tin e proposicion di Ley pa cera porta pa adopcion di mucha for di exterior. Uno di e motibonan cu ta sostene proceso aki, ta e cantidad di muchanan cu ta bira victimanan di abusadornan cu a presenta nan mes como mayor.
A wordo splica na DIARIO cu e cambionan riba tereno di normanan y balor rond mundo, tin tambe como resultado, cu e proceso pa mira mayor y forma un familia, directamente ta base tambe pa loke ta wordo considera comercio den baby, cu ley na forma severo awor mester controla, manera a bini dilanti.
Na Hulanda e prome paso ta bira cu no por adopta mucha for di exterior pa asina evita dolor grandi cu muchanan ta experimenta actualmente.
Ta wordo spera cu e ley aki lo haci su entrada cu un aceptacion grandi, debi na e cantidad di casonan den cual muchanan ta bira victima di adultonan of ta wordo forsa pa hiba un bida a base di moral cu nan no por sostene.
Den e caspo aki e mucha no tin un familia natural, manera omonan y tantanan natural cu e por acerca, pero ta depende tambe di familia, cu no ta su familia natural cu tur resultado cu esaki por tin.
DIARIO ta den sigui den contacto cu su informantenan pa sigui atende cu e asuntonan serio di abuso di mucha cu ta birando uno di e topiconan internacional di mayor impacto na e momentonan aki, debi na e cantidad di hobennan desorienta y problemanan serio cu adopcion ta trece cune y ta resulta den loke informantenan ta cualifica como comercio di mucha.
Na nan opinion pues Aruba mester cuminsa sincronisa e maneho di e topico aki cu Reino a base di puntonan cu DIARIO lo sigui amplia ariba.
