Na momento cu Gobierno actual a pone Aruba na top den Reino
*Por paga debenan di belasting di Pueblo tambe cu inversion?
*Mike kier ripiti calamidad politico di Mitar BBO y “Bo Aruba”
ORANJESTAD (AAN) — “Ta increibel cu partido AVP, cu na 2023 a mira su votegetternan importante bira lomba pa nan origen politico, no tin e curashi di lanta para y splica Mike Eman cu na e momentonan aki, Aruba mester di seriedad y no mas creacion di aventura y calamidad, pa Mike Eman bolbe trata di yega na poder.”
Palabranan di Arubianonan experto riba nan tereno, cu ta sumamente preocupa cu e idea cu ta wordo lansa dor di Mike Eman, cu Aruba mester transforma su debenan den inversion.
“Atrobe Aruba mester tuma nota con Mike Eman ta uza un strategia politico sumamente peligroso pa haya voto den e situacion sumamente dificil cu su partido ta aden, a base di e espectaculonan di Husticia cu mester atende cu e casonan di Benny Sevinger y Paul Croes y e exodo di votegetters di e partido,”informantenan ta mustra.
Loke Mike a inventa na 2023 pa cumpra curazon di e votador Arubano, ta duna tur indicacion cu Mike Eman ta nenga di siña e les cu experencia doloroso di Aruba mester a entrega su partido.
“Na e momentonan aki, mundo ta aplaudi Aruba pa motibo di e forma cu Gobierno Evelyn Wever-Croes, den e drama financiero economico total cu el a hereda, a sa di eleva Aruba den Reino y rond mundo,”ta bini dilanti.
Expertonan ta indica con Aruba a atende cu e herencia di Mike Eman, cu a destrui Aruba cu su atentado fatal contra Florin ora el a baha BBO cu mitar y a hinca Aruba den un desastre cu tabata mara na otro desastrenan di creacion di debe nacional pa paga despues y e proyectonan Bo Aruba, cu tambe mester paga despues.
“E forma cu Aruba a logra maneha e situacion financiero di Aruba, sigui cu crecemento economico di e pais cu ta un ehempel pa henter Reino actualmente, ta bolbe wordo pone na peliger cu e fantasia nobo di Mike Eman cu mester cambia debe den inversion,” informantenan ta indica.
Segun informantenan e hecho cu e debenan cu Mike Eman a laga atras pa Aruba sigur no por pone su concenshi ta trankil, mester a conduci Mike Eman na publicamente pidi Aruba dispensa pa loke como lider politico, el a haci cu Aruba.
Manera a wordo mustra na DIARIO, e herencia di Mike Eman na Aruba tabata devastador riba tereno economico (marca pa e fayo di Citgo na momento cu turismo tambe a wordo afecta pa e desastre cu doño di Citgo Nicolas Maduro) cu Mike a trece como su socio, a produci.
E rapport di resultado di proyectonan Bo Aruba, segun expertonan, mester a habri caminda pa mara persecucion penal oficialmente na politiconan cu haci cu un pais loke Mike hunto cu Benny Sevinger a haci cu Aruba cu e proyectonan aki.
Te awe Aruba ta sufri pa e wega politico di Mitar BBO, cu a pone Mike Eman na mando y a bira e origen di destruccion di Aruba, cu milagrosamente a sobrevivi e peor politico cu historia politico di Aruba a produci, cu ta Mike Eman.
Ta increibel cu Mike Eman awor a bira predicador di un formula cu ta haci cu e mester bolbe tuma e palabra “debe”den su boca, ta bini dilanti.
Mike ta bin splica cu e solucion pa debe di Aruba, ta pa cambia e debe den inversion.
Si esaki bira maneho di Aruba, (si otro paisnan acepta) porta ta bolbe habri pa peliger, cu ta base di gobernacion di Mike Eman, cu a cumpra curason Hulandes cu proyectonan di Hulandesnan cu ta uza Aruba como hub pa haci negoshi cu otro pais.
“Kico a pasa cu e proyecto aki?” informantenan ta puntra mescos cu nan ta cuestiona con a reparti proyectonan di Bo Aruba na interesadonan mientras Pueblo awor ta paga pa e resultado real cu belasting.
Maneho di Mike Eman tabata marca como Gobierno cu a produci corupcion cu a wordo persigui den Corte.
Con e asunto di cambio debe den inversion ta bay y si yega na e areglo aki pa pais Aruba, e mester bira un areglo tambe pa e ciudadano di Aruba of cualkier otro persona cu tin debe cu e mester paga na Aruba, pero ta dicidi di cambia esaki den inversion?
Informantenan ta mustra cu ta un formula sumamente peligroso Mike Eman ta presenta atrobe na Aruba y den Reino. Cu otro politiconan di Reino ta shake hands cu Mike mientras den nan cabez nan pensamentonan ta keda scondi, ta normal den politica internacional.
Pa Aruba si e ta sumamente peligroso pasobra atrobe un maneho cu por habri porta pa favoritismo politico riba tur tereno, ta keda presenta como solucion dor di lider di un partido y ex Prome Ministro di un Gobierno, cu a produci sentencia di prison y hasta miembro di Parlamento cu Huez a manda prison!
