Hefe Deporte Escolar y Recreacion IBiSA ta informa
*Importante pa mayornan pasa over di calender
ORANJESTAD (AAN) – Kamilah Dammers, Hefe di Deporte Escolar y Recreacion na IBiSA (Instituto Biba Saludable y Activo), den conferencia di prensa a duna informacion tocante e calendario escolar 2024-2025.
Kamilah a menciona cu e calender a bay scolnan siman pasa, pero mas cu claro e informacion mester bay tambe na e mayornan, pasobra nan ta esnan cu mester inscribi nan yiunan.
El a splica cu tin tres diferente calendario: esun di Kleuteschool, scol basico y scolnan avanza. Scolnan ta den proceso pa indica IBiSA cual ta e competencianan cu nan lo participa na dje y p’esey tambe ta hopi importante pa mayornan sa kico ta wordo ofreci den e calendario.
Asina e mayornan por repasa na cada calender y wak e cantidad di deportenan cu tin, kizas cu nan yiunan ta practica, of kizas no, pero ta interesa den dje.
Kamilah a menciona cu por wak cu deporte escolar ta sigui crece. Despues di pandemia, na 2021 IBiSA tabata tin participacion di 2.900 mucha, na 2022 tabata tin 3.800, 2023 tabata tin 4.200, y asina por mira con e ta sigui crece.
Hopi federacion ta acerca IBiSA pero tin un limite tambe, pasobra aña escolar ta algun siman so, pues no ta hopi. El a subraya cu e docentenan di scol sa cu e calendario semper ta full yen y IBiSA ta tene cuenta cu esey.
E aña aki, no necesariamente lo pone cosnan extra, pero lo enfoca riba locual ta haciendo caba, p’asina haci esaki miho.
“Tur e competencianan cu ta bay cuminza for di entrante September caba, ta un cualificacion pa otro aña. Pues, di awo te December tin tur e clasificacionnan pa e Weganan Interinsular. Esey kiermen cu otro aña pa Maart cu April, nos ta bay tin e ganadornan cu ta bay competi na Aruba, Bonaire y Curacao, pero nan tin cu forma parti di e clasificacion aworaki”, Kamilah Dammers a señala.
El a reitera cu ta hopi importante pa pasa door di e calender. Eynan ta aparece tambe cual ta e ultimo dia pa inscribi. Varios di nan ta awo caba: September, October, November te cu December y ora aña habri lo sigui cu e clasificacionnan escolar. Esey tambe lo tuma lugar na April prome cu Pasco Grandi.
“Weganan escolar ta un proyecto hunto cu Ministerio di Deporte, y ta uno, bunita, y semper nan ta yama IBiSA cu nan kier pa nan yiu doemee, pero tambe e clasificacion a pasa caba. Pa e clasificacion di wega escolar, tambe ta bay tuma lugar na December cu Januari, Februari y un tiki den Maart. Pesey ta importante pa participa den e clasificacion, si no bo no yega na e weganan”, Dammers a señala.
