Directie Natuur en Milieu:
*Calconan ta un parti valioso di nos herencia natural
ORANJESTAD (AAN): Directie Natuur en Milieu ta indica cu na Aruba, tin e privilegio di por haya e sorto di calco aki pa wak. Originalmente yama Strombus gigas, pero awor cientificonan a cambia su nomber pa Aliger gigas of Lobatus gigas. Na Corsou nan a yega di yama e sorto aki Kinkon, pero awendia no ta uza e terminologia ey mas. Na Ingles nan ta yam’e 'Queen conch' cu ta e calco di mas grandi y ta esun mas popular den Caribe.
E especie unico aki su casca parti pafo ta oraño casi bruin y parti paden ta roos cla. Su color ta yud’e camufla den e ambiente di fondo di lama. E casca ta bira te 35 centimeter largo. E casca di calco tin puntanan riba dje y un rand diki na e parti habri di e bestia. E rand diki y desaroya ta indicacion cu e calco a yega edad pa reproduci. Es decir, mas diki y ola e rand aki ta, mas bieu e calco ta. E ta un animal herbivoro. E ta come yerba di lama y alga, nan ta come tambe e restonan di mata putri. E calco ta importante pa e ecosistema como cu e ta yuda mantene e yerbanan di lama saludabel pa asina otro bestianan tambe por come manera e turtuganan di lama.
Ta bon pa corda cu e especie aki ta completamente protegi na Aruba. Si hende sigui coy esakinan sin mas e cantidad lo baha y ta trece e ecosistema den lama den desbalanse. Nan ta forma parti di e cadena di cuminda pa otro bestianan marino manera turtuga di lama y tribon. Ademas, su casca ta sirbi como cas pa otro sorto den e bida marino.
Mundialmente, e calco su proteccion ta regla bou di e Convenio riba Comercio Internacional di Especie Flora y Fauna cu ta na peliger (CITES). Aunke cu hende a captura y consumi e bestianan ya for di tempo prehistorico nos mester sa cu calconan ta un parti valioso di nos herencia natural.
Den historia, e Indjannan y e pueblonan indigena den Caribe a uza partinan di e casca pa crea varios herment. Laga nos tur haci nos parti awo pa proteha e sorto aki pa generacionnan cu ta bin tambe por admira nan
