Calypso Showdown lo ta dia 9 di Augustus venidero
- Un estilo diferente pa atende Aruba Caiso Monarch mey-mey di aña
ORANJESTAD (AAN): Durante un conferencia di prensa convoca na sede di Setar NV, na un forma grandi Stichting Musica a anuncia cu nan ta cla awor si pa organiza e parti di ‘Calypso Showdown’ cu ta pertenece na Aruba Caiso Monarch.
Edwina Werleman di Stichting Musica, a declara cu e realidad ta yegando pa asina trece evento di Aruba Caiso Monarch 2025, totalmente transforma y den un bachi nobo, pa publico. Nan ta spera cu e actividad aki lo bay bira uno cu sigur Aruba lo no lubida, como cu e ta comienso di un bon futuro, tanto pa e cantantenan di Calypso, y pa publico disfruta y scucha y goza cu lo por tin un Calypso cu lo resona henter aña.
En general, artistanan di e genero aki a bin ta mehora cada aña nan presentacion y e calidad di produccion. Segun Werleman, esey nifica cu Aruba ta cla pa bay scucha Calypso keda toca henter momento di aña. E ta un deseo di Stichting Musica pa e bira realidad. Pues mescos cu demas islanan den Caribe, no ta djis durante temporada di Carnaval so ta tende Calypso resona.
Awor Stichting Musica den colaboracion cu Setar NV, ta cla pa presenta e actividad cultural y musical mas grandi di Aruba. Tambe lo ta bay organiza esaki cu sonido y luz di Elite Productions. Asina nan ta invita pueblo di Aruba pa presencia e Aruba Caiso Monarch 2025.
Calypso Showdown: Segun Edwina Werleman, e evento aki lo ta un forma autentico pa Aruba, no djis pa e color musical, sino por bay briya cu e colornan vibrante cu lo ta rond di e festival aki.
E plataforma nobo di e competencia lo bay tin un All-Star Band, bao direccion di Dwight Leoneta. E evento lo bay hiba e nomber “Calypso Showdown” cu lo conta cu minimo 15 participante, cu lo subi escenario cu produccion original y lo tin di wordo presenta den forma di un show.
Durante e anochi lo bay tin artistanan invita na e evento, y nan lo enfoca principalmente riba musica clasico di Caiso.
Un premio gordo: E evento ta Diasabra dia 9 di Augustus, y lo bay ta den aire liber dilanti di Kulture Cafe na San Nicolas. Lo bende e actividad tambe cu mesa, pa hendenan por sinta y disfruta di e presentacion di e Calypsonians.
Lo bay mantene un prijs familiar pa e evento, y entrada lo bay ta 35 Florin pa persona. Tambe lo bende mesa pa 10 persona y na prijs di 350 Florin.
Ticket ya caba ta na benta riba e plataforma di Pay.aw pa bo tin bo ticket.
Cu e sosten ricibi, a anuncia cu e premio pa ganador of ganadora ta uno maximo di 10.000 Florin. Lo tin premio pa mihor compositor, mihor areglista, premio pa best show, y premio di best costume. Esaki lo ta bale la pena pa publico conoce kende ta bira e Aruba Caiso Monarch 2025.
DIARIO ta pensa cu e premio gordo di 10 mil Florin aki ta uno cu ta haci e competencia aun mas interesante! Un premio grandi pa un evento ta balioso, pasobra e ta aumenta significantemente participacion, ta genera publicidad, y ta inspira innovacion tambe. E premio lo motiva cantantenan pa subi escenario y competi mas vigorosamente y e Calypso Showdown por atrae mas publico, incluyendo esnan cu kizas lo no a pensa di bay mir’e tampoco.
E publicidad rond di un premio gordo, por hala mas atencion di hendenan cu ta bay tuma nota di e Calypso Showdown aki, y lo bay trece mihor impacto.
E evento yama oficialmente “Aruba Caiso Monarch 2025: Calypso Showdown” lo ta dia 9 di Augustus 2025 lo cuminza pa 7:00 pm.
