Presidente di SADA Edward Maduro:
* Nan tin siete aña abandona sin haya oido
*Ainda no a rosa tereno pa edificio nobo
ORANJESTAD (AAN) – E presidente di Sindicato di Aduana (SADA), señor Edward Maduro, den entrevista cu DIARIO a expresa cu e caida di gobierno no ta afecta mucho e Departamento di Aduana, pasobra pa siete aña caba ta abandona, y esaki ta un di e dienstnan di mas abandona pa e gobierno aki.
Manera ta conoci, desde basta tempo caba gobierno mester a traha un edificio nobo pa Aduana, na Barcadera. Pero esaki a keda pendiente te ainda. Un tempo pasa e departamento a muda pa un edificio di huur, y awo lo bolbe muda pa otro na Bushiri, manera e director mes a declara poco dia atras.
DIARIO a puntra Edward Maduro tocante e plan pa traha un edificio nobo na Barcadera. E lider sindical a duna e siguiente contesta:
“Kizas tin cosnan cu ta den tapara of ta den pipeplan, pero tin hopi tempo tin cosnan den pipeplan pa nan.
“Pues mucho e caida di gobierno no ta afecta nos, y por ehemplo pa menciona e edificio nobo esaki ta den pipeplan desde aña 2016 y cada rato tin cosnan cu ta bin dilanti. Na principio di Januari, ora cu tabata celebracion di Dia di Aduana, Minister di Finanzas a ‘give fun’ bisa cu ‘awor si e edificio ta bin’. Mi no sa con pa bis’e nechi, pero despues di ocho luna e tereno nan no a ni rose ainda. Corda pa pone e prome bloki”, segun Edward Maduro.
El a señala cu SADA tin hopi pensamento di kico ta pasando, pero ora cu bo no ta haya oido cerca e minister pa nos bise kico nos ta pensa cu ta “going on” nos no ta haya claridad.
“Tin cosnan cu nos no por manda riba website of via mensahe, nos kier haya e minister den un reunion pa bis’e kico nos ta kere cu ta pasando, pa nos puntre pakico e edificio no a yega na turno ainda. Tin hopi cos cu nos ta bisa ‘algo no ta bayendo bon’. Awo, nos no sa si no ta bayendo bon pa mala suerte of pasobra nos mes ta pon’e bay malo”, Maduro a acentua y a remarca cu pa su persona y e miembronan di SADA, algo ta bayendo robes!
Maduro a reitera cu desde Juni SADA a pidi un reunion cu Minister pa papia tocante e edificio nobo, cu ta algo cu SADA ta considera urgente, pero e minister tabata hopi druk, cu un agenda full yen, y cu pa siete aña largo Aduana ta abandona, nan no ta dune oido, p’esey SADA no ta sinti cu caida di gobierno tin efecto riba Aduana!
