ORANJESTAD (AAN): Prome Minister Evelyn Wever-Croes a indica cu despues cu Aruba a pasa den temponan hopi dificil,
durante su discurso dirigi na pueblo di Aruba diadomingo ultimo, a anuncia noticianan y desaroyonan positivo cu ultimo dianan a pasa pa nos pueblo. Un desaroyo hopi positivo den e ultimo dianan aki, ta e anuncio cu a logra cambia e acuerdo relaciona cu e entradanan di e loterianan di Lotto pa Deporte. Di tur e ganashi di e loterianan di Lotto pa Deporte antes 8.25% tabata bay Canada. Pero desde 2011, e areglo a worde cambia y 23.5% ta bay Canada, y e resto tabata keda Aruba.
Asina den e añanan 2011 pa 2020, por lo menos 104 miyon a bay Canada y 34 miyon so a bay den deporte na Aruba. Lamentablemente, esaki a stroba hopi mucha y hoben deportista pa bay den exterior pa competi, of mester bende rifa den solo pa logra cera e cen pa nan competi den exterior. E acuerdo awor lo worde cambia den net contrario, 8.25% ta bay Canada y e resto ta keda Aruba pa worde inverti den deporte na Aruba y den deportistanan di Aruba. Esaki ta un gran logro pa Lotto pa Deporte, pa nos hobennan deportista y un gran logro pa Aruba en general.
Cu e logro aki, Lotto pa Deporte ta sali gana. Nos hobennan deportista ta sali gana. Aruba ta sali gana. Pabien Aruba. “Cada hoben deportista ta un hoben menos riba caya. Cada hoben deportista ta un hoben cu ta bay haci cosnan grandi pa su pais”, Prome Minister e enfatisa.
