Prome Ministro den welga di hamber y Benny den neishi di araña
*Corupcion lo a triunfa ora caha di placa di Aruba a keda bashi
*Cuanto Avestrus a costa Pueblo compara cu e piñata di “Bo Aruba”?
ORANJESTAD(AAN)—Ora papia di e Caso Avestrus, mester para keto na uno di e peligernan mas grandi di demoracia, cu ta e porta cu e ta habri pa crimen.
Democracia ta basa riba e deseo di Pueblo, cu no semper ta basa riba bienestar di Pueblo pa e hecho cu manipulacion por ciega Pueblo, cu ta consisti di hende.
E solo hecho cu tur hende ta pecador, pues na un momento of otro ta comete eror den su bida, ta duna prueba cu hende por wordo influencia, loke sigur ta parti di e magia cu demasiado bes ta dicidi pa popularidad politico.
Nos ta dedica atencion total na e caso Avestruz pasobra ta den e caso aki, acusacionnan ta presenta na Pueblo e forma cu Pueblo por wordo lastra pa abismo dor di corupcion, cu manera e palabra mes ta bisa, ta destructivo pa hende y pa comunidad.
Na momento cu fechanan a wordo menciona, imediatamente DIARIO a pone e acusacionnan den luz di e realidad politico di Aruba, cu tabata uno cu tabata presenta un situacion politico sumamente peligroso.
Pueblo di Aruba tabata den un euforia total ora segun acusacionnan den Corte, Benny tabata asumi su puesto central den un neishi di haraña ladron.
Nos ta uza e palabra ladron, pasobra derechonan fundamental cu democracia ta duna tur ciudadano, a wordo horta for di e Arubiano cu tabata den e necesidad cu a haci cu a introduci leynan pa e Arubiano cu no por a cumpra su propio cas, por a haya tereno di Gobierno.
Kico tabata pasa na momento cu Benny Sevinger lo tabata figura central den e neishi di personanan cu tabata den hopi caso, mara na su partido manera a keda demostra den Corte di Husticia?
E Pueblo di Aruba, mientras Benny lo tabata entrega terenonan di Aruba na un grupo cu a wordo privilegia y tabata tin poder den e partido, tabata den gara di atraccion politico di e lider di e partido di Benny Sevinger, cu ta Mike Eman.
Mientras Benny Sevinger segun acusacionnan tabata entrega na amigonan poderoso di e partido di Benny, terenonan sumamente valioso cu a produci placa pa e grupo de grupo beneficia, Aruba tabata den estado di un revolucion contra Hulanda y manifestacion na fabor di Mike Eman pasobra Hulanda a pone fin na e destruccion di e Florin Arubano dor di e maneho di Mike Eman.
Cabez y wowo di Pueblo a wordo pusha den santo na 2014 ora Pueblo a wordo uza dor di Mike Eman pa lanta contra Hulanda, cu a presenta na Aruba pa evita cu Aruba ta bay bancarota.
Wowo di Pueblo a wordo tapa y pusha den santo pa Pueblo no mira, con e maneho di Mike Eman tabata destrui futuro di e Arubiano, cu a lanta para contra Gobierno Hulandes cu a exigi Mike Eman pa cambia su maneho y asina a scapa Florin.
Pueblo no por a mira kico ta pasa, pasobra a ciega Pueblo den un euforia total cu un publicidad cu no tabata basa riba e berdad di Aruba pero riba e engaño politico di e momento.
Cuanto Avestrus a costa Aruba? Cuanto placa e partido tabata tin pa campañanan di publicidad mentiroso na 2013 manera tempo a duna prueba?
Con importante aporte financiero na e partido tabata? Pasobra pa mobilisa Pueblo mester di placa!
Esaki ta e elemento cu nos ta descubri den e acusacionnan oficial di Ministerio Publico.
Prome cu e scandal di Avestrus a rementa, ya nos tabata adverti Aruba pa e proyectonan di “Bo Aruba” cu a wordo investiga dor di Algemene Rekenkamer Aruba cu a traha e rapport cu Benny Sevinger a tene den su lachi pa Pueblo no mira prome cu eleccion 2017.
E proyectonan “Bo Aruba” ta basa riba otorgamento di proyectonan cu tambe tabata tin mester di tereno y cu a wordo realiza cu 1.6 Biyon di Pueblo cu ni Hulanda por controla.
Corupcion a triunfa na 2014 ora Hulanda a bin anuncia cu caha di Pueblo tabata bashi?
Kico gobernacion a haci cu Pueblo na 2013 ora Pueblo tabata incapaz di mira e realidad?
Ora Ministerio Publico tabata presenta su acusacion, el a exigi periodismo biaha na 2013 ora Aruba tabata victima di politica cu a uza Pueblo di Aruba pa lanta para contra Hulanda.
Na mes momento, lo tabata destrui e alma di democracia dor di entrega tereno di Aruba na amigonan poderoso, cu por a haya mas Miyones y Miyones cu benta di e propiedad cu mester a sirbi un grupo grandi di Arubiano!
