ORANJESTAD (AAN): Diabierna siman pasa den un encuentro ameno y informativo Minister Endy Croes a reuni cu Coordinador Nacional di Codigo di Proteccion
y Beleidsmedewerker Ministerio Husticia y Asuntonan Social Sra. SueAnn Ras y lider di proyecto di Codigo di Proteccion pe Sector di Enseñansa Sra. Jullie- Ann Thodé.
Desde 1 di april 2021 e Codigo di Proteccion a drenta na vigor y ta un di e proyectonan central y principal di Social Crisis Plan. E profesionalnan den e sector di Enseñansa tambe lo traha a base di Codigo di Proteccion den caso di abuso di mucha.
E Codigo di Proteccion ta un protocol cu e profesionalnan lo uza ora nan tin sospecho di abuso di mucha. E Mandatario a sigui bisa hunto cu Departamento di Enseñansa, DPS, directivanan di scol y Codigo di Proteccion lo organisa un dia di informacion y lo duna training pa e cabesantenan y docentenan di scolnan publico den cuadro pa duna e proteccion total ne muchanan. Y asina hopi tempran e maestra y maestro por nota cualkier inkietud y si tin sospecho di abuso por señala esaki, ta importante pa nan ta na altura di e protocol, con pa actua, ken pa yama y cua documento pa yena.
E sistema cu a wordo crea pa pone atencion y pa proteha nos muchanan. Ministerio di Enseñansa lo percura pa tur e dies directivanan di scol ricibi e training aki pa asina tur hende ta riba un linea y pa brinda proteccion y siguridad na tur muchanan y hobennan.
