ORANJESTAD (AAN): Integridad por fortifica of kibra confianza den gobierno.
Pa esaki, Bureau Integriteit Aruba (BIA) tin un rol fundamental den promove y salvaguardia integridad den departamentonan di gobierno di Aruba.
BIA ta un departamento di gobierno y e unico organizacion publico cu ta dedica specificamente na e tema di integridad den gobierno. E team ta consisti di cinco empleado: un hefe, un investigado, dos empleado di maneho y un asistente.
Den un contexto internacional unda preocupacion riba corupcion y su impacto riba stabilidad y siguridad di sociedad a resulta den e Convencion di Nacionnan Uni contra Corupcion riba 31 october 2003, gobierno di Aruba a tuma varios medida pa combati corupcion. Den e cuadro aki, a establece BIA.
E tareanan principal di BIA ta entre otro formula y asesora riba maneho di integridad, y prevencion, ofrece entrenamento y informacion pa empleadonan publico y fungi como punto di notificacion pa sospecho di kiebro di integridad.
Actualmente BIA ta traha riba diferente proyecto importante. Un di nan ta e Codigo di Conducta Integridad pa Empleado Publico, un proyecto conhunto cu Departamento di Recurso Humano (DRH). E codigo lo brinda guia y proteccion pa empleadonan publico pa reconoce riesgo y fortalece nan resistencia contra situacionnan delicado.
BIA tambe ta coordina e red di Vertrouwenspersonen Integridad Land Aruba, un punto di contacto confidencial y independiente unda empleadonan publico por raporta sospecho di violacion di integridad. Ademas, BIA ta ofrece entrenamento, modulo di integridad y sesion di informacion na diferente servicio publico, y anualmente ta organiza reunionnan cu hefenan di servicio riba integridad y liderazgo etico.
Como puntro di notificacion oficial, tur persona, tanto empleado publico como ciudadano por haci un notificacion di un sospechoso di kiebro di integridad cu a tuma luga na un departamento di gobierno. E sospechoso mester ta basa riba echo concreto y no simplemente riba rumor. Por haci un notificacion via e website www.bia.aw of na e departamento concerni. Ademas por pasa na oficina di BIA situa na L.G. Smith Boulevard 20, na unda antes tabata oficina di Notario Yarzagaray, den mesun edificio unda LAR ta ubica.
