Maikel Gomes a indica:
ORANJESTAD (AAN) Señor Maikel Gomes, Relacionista Publico di Bureau City Inspector, den entrevista cu Matutino DIARIO, a indica cu BCI a habri bon e aña aki te ainda, pero e siman aki tabata tin melding cu a drenta cu riba Henny Eman Boulevard (ex-Smith Boulevard), varios hende cu tin kavel a marca nan caba riba caminda, y Dialuna mainta hunto cu Departamento di Infrastructura y Planificacion (DIP), nan a bay kita esakinan pasobra no tin permiso di haci esaki ainda.
Maikel Gomes a bisa cu segun e tin entendi te un siman prome cu Carnaval, mag di marca kavel, ora nan ta wordo otorga, pero no riba e persona mes, y pueblo ta haciendo esaki.
BCI hunto cu DIP a atende cu esaki, pero e trabao ta cay mas bao maneho di DIP mes. Aworaki nada ta wordo permiti, señor Gomes a remarca: ni banki, ni cabuya, cadena, etc., y cu tur esaki kavel a wordo marca, te ora DIP duna ok y otorga e permisonan concerni, el a reitera.
Maikel Gomes a subraya cu tur e dianan aki, e rutanan ta keda controla.
El a trece dilanti tambe, cu Bureau City Inspector, manera tur aña lo parti saco pa sushi y nan ta na mesa pa fiha e paradanan cu ta bay tin, pero seguramente lo parti saco den e paradanan grandi, y durante lighting paradenan. Gomes a haci un yamada y recorda pueblo cu prome, y despues di e paradanan mester mantene e rutanan limpi, y mescos banda di lama. Esnan cu no ta bayendo carnaval, pero ta bay beach, pa haci nan fiesta cu nan tin, pero laga e beach manera nan a haye, pues, no laga sushi atras!
