ORANJESTAD (AAN) – Cu bunita palabranan, docter Joel Rajnherc, director di Instituto Medico San Nicolas (ImSan), a tuma e ocasion di e entrevista cu DIARIO,
pa dirigi un mensahe di bon deseonan na pueblo di Aruba en general, San Nicolas en particular y e pashentnan, tanto den su nomber como di e personal di ImSan, pa cuida nan salud mirando cu falta menos di dos siman pa December drenta te yama ayo na aña 2023 y bon bini na aña 2024, y tin dianan di fiesta nos dilanti cu mester percura pa disfruta na un forma saludabel y safe.
“Manera tur aña, na prome lugar bendicion pa henter pueblo, y e miho deseonan di tur nos trahadornan na ImSan pa nos poblacion. Nos ta hopi orguyoso cu pueblo ta asina ahusta na ImSan, cu ta acepta tur e temponan di spera, cu mi sa cu ta hopi fastioso pa e pashent, pero nos tambe ta purbando di reduci esaki.
Apesar di esey, den e siguiente dianan di fiesta, tene cuidao cu alcohol, ‘si bo bebe no stuur, y si bo stuur no bebe’. Anto tambe, pa tur e pashentnan cu tin problema caba cu nan sucu, tene cuidao cu ne. Tur e bolonan, e ayacanan, nan ta hopi dushi pero haci’e cu cabes, no cu stoma so. Pues, ‘take care of yourself’ wak kico bo ta come, kico bo ta come, y haci’e pa hopi mas”, dr. Rajnherc a señala.
