ORANJESTAD (AAN): E asina yama “Onverzettelijk: Marisol, 27 jaar in de Arubaanse politiek” ta un obra di conhunto di autor Kees Beekmans y señora Marisol Tromp.
Esaki ta e storia/biografia ‘no censura’ di e dama politica “manera mi a experencia tur cos”.
Señora Marisol Tromp ta trata na describi su carera como politico den e contexto compleho di un isla chikito y e cultura na Aruba. E lector ta haya un bista fascinante riba e scenario politico Arubano. Señora Marisol Tromp a constata cu tin diferente opinion riba tur locual el a experencia durante su carera y ta relata su banda di medaya di e susesonan. Por ehempel, eherce e profesion di politico riba un isla chikito manera Aruba ta completamente diferente for di e realidad di un politico na Hulanda, segun Tromp. E publicacion ta contribui na e documentacion di e historia parlamentario.
E autor Beekmans ta laga Marisol Tromp na palabra den algun capitulo riba temanan di su hubentud na Malmok, su añanan como studiante na Hulanda y su experencia di trabao como gezinspedagoge prome cu el a drenta politica, como tambe su experencia como miembro di e partidonan MEP y AVP.
Beekmans a studia Nederlandse taal- en letterkunde na e Universidad di Amsterdam y a traha como reportero pa de Volkskrant. Na 1995 Beekmans ta opta pa un carera como docente den enseñansa avansa. Storianan cu el a skirbi tocante e scolnan a keda publica den NRC Handelsblad, Trouw y Margriet. Na 2005 Beekmans a muda pa Marokko, caminda el a traha como coresponsal pa Volkskrant y De Groene Amsterdammer. Na 2010 Beekmans a publica su prome novela ‘Sirocco’ y e buki ‘Tussen hoofddoek en string’, den cual e ta describi e modernisacion di Marokko, e consecuencianan y e relacion di esaki cu Islam. Beekmans ta biba na Aruba actualmente, desde 2021, y ta docente den Enseñansa Avansa.
Señora Marisol Tromp a haci entrega di 3 ehemplar di ‘Onverzettelijk’ na directora di Biblioteca Nacional Aruba, señora Astrid Britten y hefe di Dept. Arubiana señora Zetsia Ponson pa e coleccion nacional.
Den publicacion ta presenta tambe algun cartoons di Ron Wever, d.f.m.
