Di Aruba pa Mundo
ORANJESTAD (AAN): Bucuti & Tara Beach Resort, Aruba a ricibi e premio Silver den e ICRT Responsible Tourism Awards 2026 pa Turismo Regenerativo, reconociendo casi cuatro decada di trabou pa fortalece e medio ambiente, comunidad local, cultura y economia di su isla.
Bucuti & Tara ta e unico hotel den Caribe cu a ricibi un ICRT Responsible Tourism Award pa Turismo Regenerativo na 2026, loke ta marca un logro importante pa Aruba y ta destaca e potencial di e destinacion pa mustra con turismo por contribui activamente na e bienestar na largo plazo di su hendenan y su lugar.
Desde cu a habri su porta na 1987, Bucuti & Tara a basa su manera di traha riba e conviccion cu exito di un negoshi turistico ta inseparable for di bienestar di e destino riba cual e ta depende. Bou di Fundador Ewald Biemans, y awor hunto cu su nieta, Managing Director Crescenzia Biemans, e filosofia aki a desaroya te bira un modelo amplio di turismo cu ta bay mas leu cu solamente reduci daño: e ta contribui activamente na e resiliencia ambiental, social, cultural y economico di Aruba.
E enfoke ta encera restauracion ambiental, empleo y proveedornan local, bienestar di empleadonan y nan famia, coneccion cultural, bienestar di bestia, inversion den comunidad y participacion di huespednan.
E ICRT Responsible Tourism Awards, presenta pa e International Centre for Responsible Tourism, ta reconoce organisacionnan cu ta demostra impacto medibel, innovacion, influencia y practicanan cu por inspira cambio positivo den henter e industria turistico. E categoria di Turismo Regenerativo ta reconoce enfokenan cu ta busca laga destinacionnan mas fuerte, creando resultadonan positivo riba tereno ambiental, social, cultural y economico.
Un Modelo Regenerativo cu Raiz na Aruba
E Bucuti Tara – GMC Nature Preserve di e resort ta proteha permanentemente 32 acre na Noord contra desaroyo. Vehiculonan motorisa di cualkier tipo ta prohibi, loke ta yuda preserva e area como habitat natural y un refugio trankil den un parti di e isla cu ta bira cada bes mas desaroya.
E area protehi ta representa un ecosistema tipico Arubano y ta ofrece habitat pa flora y fauna nativo. Mas cu 1.200 mata nativo a wordo planta te awor, cu un meta a largo plazo di aproximadamente 15.000. Segun e ecosistema restaura ta madura, ta ser proyecta cu lo e kita aproximadamente 375 tCO₂e pa aña, aumenta biodiversidad y contribui na e resiliencia climatico di Aruba. Cu tempo, e area ta destina pa bira un espacio natural trankilo caminda residentenan y bishitantenan por cana, core of simplemente pasa tempo entre mata indigena, vegetacion y fauna di Aruba.
"Aruba ta nos cas, y e exito di turismo mester nifica tambe exito pa nos isla y su hendenan," Crescenzia Biemans, Managing Director di Bucuti & Tara Beach Resort, a bisa. "Nos ta sumamente agradecido pa e reconocemento aki cu ta nifica asina hopi pa nos team y nos partnernan den comunidad. Pa nos, su balor ta den loke e ta haci posibel: naturalesa proteha, bestianan cuida y un isla mas prospero y saludabel pa esnan cu ta bin despues di nos."
Pa Bucuti & Tara, e premio ta un reconocimiento pa e trabou, no e motibo pa hacie. E proposito ta keda mescos: pone Aruba prome, y yuda asegura cu e isla por prospera pa generacionnan cu ta bini.
