Franchesca Heinze, directora di ATHA:
- Entrante Dialuna un siman di deseonan special refleha den pan
ORANJESTAD (AAN)- Franchesca Heinze, directora di Asociacion Trabao pa Hubentud di Aruba (ATHA) den entrevista cu DIARIO a indica cu ATHA ta forma parti di e Comision Nacional Derecho di Mucha, hunto cu otro organizacion gubernamental, y den contexto di Dia Internacional di Derecho di Mucha, Dia 20 di November awo, el a relata tocante e Tratado Internacional cu a nace 69 aña pasa.
“Ya ta 69 aña pasa cu Nacionnan Uni a declara e fecha 20 di November como e Dia Internacional di Derecho di Mucha. Despues di algun aña lidernan global a uni na esaki, y nan ta enfoca specialmente na proteha e mucha.
“E no ta pa kita autoridad ni responsabilidad di mayornan. Ta importante si pa corda cu muchanan ta imita locual nan ta wak, pues nos como mayor, lider, guia di mucha y hoben, tin e deber di ta e ehempel pa nan.
“E Comision Nacional di Derecho di Mucha, un biaha mas tin e honor di informa comunidad cu Bright Bakery ta bay aporta na e Tratado di Derecho di Mucha. Nan ta bay haci esaki door di pone un deseo special, cu ta ilustra algun di e articulonan riba e kipashi plan blanco y bruin. Esaki specialmente den e siman cu ta cuminza desde dialuna 20 di November”.
Franchesca a agrega cu den e siman aki mes, tambe tin diferente instancia cu ta organizando eventonan pa mucha. Por tuma nota di e programa cu el a menciona, den articulo apart.
