ST. THOMAS: Oficialnan di Air and Marine Operations (AMO) di US Customs and Border Protection,
hunto cu esnan di Homeland Security y Drug Enforcement Administration (DEA) a intercepta recien un boto cu 4 persona di British Virgin Islands abordo cu tabata transportando 667 kilo di cocaina. E balor calcula di e contrabanda ta casi 20 miyon Dollar.
Esaki ta demostra cu narcotraficantenan a cuminza usa diferente ruta pa trata na drenta nan droga na Merca.
Tabata un tripulacion di avion di AMO bulando banda pariba di US Virgin Islands, cu a detecta un boto di 2 motor ta move cu velocidad halto. Y nan por a mira cu nan tin contrabanda riba dek di e boto.
Mesora a pone un boto di Coastal Interceptor di St. Thomas hunto cu un boto mas chikito di US Coast Guard pa stop e boto di 32 pia como 20 miya pariba di St. Croix. E cuatro personanan a wordo deteni.
AMO a indica cu nan ta sigui controla lama di Caribe pa stop narcotraficantenan di sigui usa e ruta aki.
