KRALENDIJK: Informacion for di Bonaire ta indica cu Gobierno a evalua pa tres luna e situacion, y a dicidi na duna luz berde pa un aumento temporal di prijs di benta por menos, di webo di galiña local.
E prijsnan di webo na Bonaire ta data di 2017, pero den e prome cuartal di 2022 e productornan local di webo a pidi pa adapta e prijs. Nan a haci esey mustrando cu mayoria prijs di materia prima pa produccion di webo di galiña a subi enormemente, y cu nan lo sigui subi tur luna.
E gasto extra aki ta principalmente prijs di cuminda pa galiña, puito, empake di webo, y gasto di transporte. E productonan local di webo a indica cu nan no por tin control riba e desaroyonan actual di prijs, den e caso aki debi na inflacion impulsa pa e invasion Ruso na Ucrania, y aumento di prijs di cuminda pa galiña como consecuencia directo di esaki.
Cu e meta pa mantene e proceso di produccion local den tal forma cu e ta cubri gasto y pa mantene webo di galiña pagable pa consumido, Gobierno di Bonaire a dicidi cu entrante e siman aki, temporalmente ta aumenta e prijs di benta por menos pa webo produci localmente cu 75 cent. Despues di 3 luna lo evalua e medida temporal aki.
Nan a indica cu prijs di benta por menor pa webo importa no ta cambia.
Corda cu na Bonaire, awor no ta usa Florin mas, sino US Dollars.
