Den casonan di problema mental
ORANJESTAD (AAN): Bon noticia ta saliendo awor for di skina di Respaldo! DIARIO a bin haya sa, cu e famoso “lista largo” di hendenan sperando di por haya un consulta pa cu problemanan, specificamente problema mental, a cuminza bira menos.
Director di Respaldo, esta Hendrikus van Gaalen a confirma esey, y a bisa cu danki na e cooperacion ricibi di e.o. e recien crea Stichting Hunto esaki a bira posible. Pues como cu tin un tiki mas profesional awor den servicio, e Lista di Espera aki a baha na seccion di “Mucha y Hubentud”, y e ta bahando poco-poco tambe na “Cuido di Adulto”.
Van Gaalen a bisa cu e lista di espera pa esnan den Cuido di Adulto lo no baha asina rapido, pasobra semper tin wachtlijst den e tereno aki. E ta pronostica cu e procesonan lo bay mehora durante 2023.
Segun e Director di Respaldo, e mehoramento a bin debi cu a dividi ‘cuido specializa’ for di ‘cuido basico’, y un grupo grandi di e wachtlijst di Respaldo cu tabatin tur cos, a bay pa Stichting Hunto. Esnan di Hunto a añadi esnan di AZV tambe riba e lista. Tur esey a yuda grandemente, aunke toch Van Gaalen ta corda tur hende cu esaki no nifica cu e ta un solucion 100 porciento.
Hopi biaha ta tende e gritonan cu keto bay den e tereno aki falta di personal profesional. Segun Van Gaalen, esaki ta un asunto di: (1) Con eficiente bo ta, con bo meta ta poni, y tur hende por siña un tiki di esey ainda. (2) Cuanto profesional tin na Aruba, y aparentemente no tin suficiente. (3) Con ta bay traha hunto.
E parti di punto 3 menciona ariba, aworaki ta bayendo den bon direccion. Ora bo traha mihor hunto, e ora ta mucho mihor pa Docter di Cas sa unda pa manda pashentnan y no djis verwijs nan unda cu ta. Pues tur esey ta yudando grandemente.
Sinembargo no mester lubida cu e problema aki ta depende djis di Respaldo of di Stichting Hunto. E ta depende tambe con Aruba ta bayendo.
“Si tin hopi pobreza aki, y cu hopi problema social, e ora bo ta keda cu un problema mental grandi tambe,” Van Gaalen a indica.
Y e problema mental entre hobennan ta grandi? Na opinion di Van Gaalen, esey ta un fenomeno cu no ta djis notable na Aruba so, pasobra bo ta mira algo similar na otro paisnan. El a bisa cu si bo keda mira e efecto di Covid-19, e ta wordo bon asimila door di adultonan, pero e no ta asina facil pa hobennan. Pues debi cu hopi mucha no a bay scol, cu nan no a socializa, y tur esey a haci e situacion grave. Toch tambe esnan di edad tiki mas grandi tambe a confronta mesun obstaculo.
