Docente di VU Amsterdam:
ORANJESTAD (AAN): Recientemente DIARIO a entrevista Anne-Mei The, docente di Vrije Universiteit Amsterdam (VU Amsterdam), riba cuido di demencia di termino largo.
El a bisa cu e ta haya hopi bon mes cu e stakeholders di henter Aruba ta uni nan mes pasobra nan ta preocupa nan mes cu e situacion di nos grandinan y kier traha riba esaki, for di nan propio perspectiva.
“Esaki ta asina tremendo y mi ta kere cu ni na Hulanda lo por yega na algo asina rapido pa yuda e adultonan mayor”, segun The.
El a bisa cu den su opinion mester tin un cadena di cuido y un cadena di cuido social.
“Adultonan mayor pa definicion no necesariamente semper ta malo of tin un limitacion fisico, pero personanan di edad halto ta bira mas vulnerable y tin mester di sosten den nan bida diario”.
No mesora sosten medico, pero a lo largo esey por bira e caso, segun The.
El a sigui bisa cu lo ta hopi bon si bin un tipo di sosten cu ta cuminza cu bida diario y poco poco ta bira un sosten di cuido.
“Si esey sosode, adultonan mayor lo sinti nan mes hopi mihor pasobra nan calidad di bida ta mehora, pero esaki lo yuda baha e presion cu tin riba sector di cuido”, segun e docente.
