E no ta e Asteroide NB2 recien descubri door di NASA
- Diasabra anochi esaki a bira un espectaculo pa wowo
- Wordo mira pa hopi na Aruba, Curaçao, Venezuela, y Brasil
ORANJESTAD (AAN): E fenomeno cu Diasabra anochi 7:50 pm a wordo mira ta pasa den estilo di un bola di candela basta largo, moviendo di pabao bayendo pariba, a wordo describi pa hopi hende mesora cu ta trata di un meteoro.
Si acaso e tabata un meteoro... e lo mester ta uno basta grandi, mirando cu el a dura bastante pa el a kima ora cu el a drenta atmosfera. Y esey mes ta e motibo pakico a cuminsa pensa cu ta “algo otro”.
E no ta e Asteroid NB2: Pa colmo, varios persona a cuminsa mustra cu e lo por ta e Asteroide identifica algun dia pasa door di astronomonan como “NB2”, cu lo pasa Diasabra 13 di Juli “basta cerca di planeta” tera.
Sinembargo awor JPL Propulsion Laboratory di Merca a mustra cu nan a sigui y detecta cu e Asteroide a pasa “relativamente” cerca di mundo. El a pasa exactamente “11 distancia lunar” leu for di mundo. Pues loke a wordo mira ta kima den cielo, NO ta e Asteroide NB2 aki.
Kizas ta Falcon 9: Kizas e bola grandi di candela por ta resto di e gigantesco raket Falcon 9 di SpaceX cu tabatin monton di satelite abordo. E raket aki, algun dia pasa a sufri fracaso grandi, ora e tabata lantando cu un cargamento nobo di satelitenan pa Starlink. E raket aki cu a wordo lanza na Merca, a sufri di un fayo catastrofico riba Diahuebs 11 di Juli 2024 y no a logra pusha e satelitenan den orbita. E raket a keda fo’i control den espacio y como cu e no a yega suficiente halto, tabata djis warda te ora cu gravedad lo trece bek abao.
Esaki a pone cu Federal Aviation Administration na Merca a pone un paro obligatorio na tur lanzamento di raketnan Falcon 9.
No ta conoci si acaso loke a wordo mira den cielo di Lama Caribe, tanto na Aruba, Curaçao, y tambe mira for di Venezuela y Brasil, kizas ta e resto di e raket Falcon 9 cu a regresa bek na tera y a kima ora di drenta den atmosfera.
E forma cu el a kima tabata mustra cu e tabatin extra “combustibel” pa produci asina hopi candela den su trayecto cu a dura como 10 seconde largo. E speransa tey cu e siman aki lo por bay haya extra mas informacion di e fenomeno cu a wordo mira den cielo, y cu a hasta “haci” cierto area bira hopi briyante mes.
