Señora Meverly Romano di DIMP:
ORANJESTAD (AAN) – Di e total di 13.909 persona cu ainda no a cumpli cu pago di impuesto pa vehiculo di motor, tin un grupo considerabel cu no a logra paga e impuesto corespondiente na aña 2026 debi na debenan pendiente di añanan anterior.
Señora Meverly Romano di Departamento di Impuesto (DIMP) a splica cu, desde cu DIMP a introduci e facilidad di areglo di pago online via e portal di Bo Impuesto (BOi), contribuyentenan a haya e oportunidad pa regularisa debenan acumula di añanan anterior relaciona cu impuesto di vehiculo di motor.
Segun Romano, e facilidad di areglo di pago ta aplicabel te cu e belastingjaar 2025. Sin embargo, pa e impuesto corespondiente na aña 2026 no tin posibilidad pa inclui den un areglo di pago; esaki mester wordo djis paga prome cu 30 di juni.
“Personanan cu, por ehempel, tin impuesto di vehiculo di motor pendiente entre 2020 te 2025, por solicita un areglo di pago directamente via e portal di BOi,” Romano a splica.
E sistema ta permiti contribuyentenan priva haci pagonan mensual cu un minimo di AWG 100 pa luna durante un periodo maximo di 24 luna. Den caso di companianan, e pago minimo mensual ta AWG 1.000 pa luna, igualmente cu un periodo maximo di 24 luna.
Debi na e facilidadnan aki, Romano a enfatisa cu DIMP ta recomenda fuertemente pa tur ciudadano crea un cuenta den e portal di BOi. Segun e, e plataforma digital ta ofrece un variedad di servicio gubernamental mas lihe, eficiente y accesibel, permitiendo contribuyentenan maneha nan obligacionnan fiscal di un forma mas conveniente.
