Ban conoce un tiki di Aruba
BOCA MAHOS ta situa pega cu Bushiribana. E nomber Boca Mahos ta procedente di e olanan grandi cu ta dal contra e barancanan na costa. Na Aruba tin hopi boca pero ningun di e bocanan ta asina notorio manera Boca Mahos. E historia di Boca Mahos ta conoci pa tragedia y tristesa.
Den tempo prome gobierno tabata tira sushi na e baranca. Mas despues abattoir tabata tira restonan di bestia for di baranca den lama. Esaki tabata atrae masha hopi tribon den e boca. Regularmente piscadornan ta gara tribon grandi.
Cu tempo gobierno y abattoir para e practica aki.
Den e di dos parti di añanan 70 informacion ta circula cu e parti di e baranca di Boca Mahos ta scheur. Algun otro piscador ta bisa cu semper e baranca tabata tin scheur aden y a bira mas visible.
Dia 22 di November 1980 dos primo piscador ta perde nan bida ora cu e parti di e baranca di Boca Mahos ta cai..Ta calcula e baranca a cai durante oranan di mainta.
Un dia despues ta haya e curpanan di e piscadornan ta drief na Boca Chikito.
Ta ser bisa cu e baranca tin mas scheur aden y por corda cu DOW a laga pone heki di aviso cu ta prohibi pa yega na Boca Mahos.
Boca Mahos ta conoci tambe pa un sitio cu diferente local y turista a cai na lama y a hoga y diferente hende a comete actonan di suicidio bulando cu auto y tur for di e baranca.
Hendenan grandi di barionan pega cu Boca Mahos manera Rooi Prikichi, Matividiri semper ta papia cu tur ora Boca Mahos ta yama un alma.
Den e ultimo añanan algun “ tour guides” ta trece turista y algun local pa baha na Boca Mahos y landa patras di e barancanan cu a cai. Hasta otro nomber a duna Boca Mahos, kisas sin sa e peliger di Boca Mahos.
Compila pa Roberto Croes
Nos Historia Nos Herencia
