ORANJESTAD (AAN): Directie Natuur en Milieu ta duna di conoce cu e Blauduif tambe yama Paloma di baranca ta miembro di e famia di parhanan, Columbidae.
Su nomber cientifico ta Columba squamosa of Patagioenas squamosa. Na Ingles nan ta yama e sorto aki un ‘pigeon’ cu e nomber Scaly-naped pigeon of Red-necked pigeon.
E palabra paloma ta uza pa ambos, paloma y ‘pigeon’. E dos sortonan aki no conoce un distincion cientifico, nan ta confundi un paloma cu un ‘pigeon’ hopi biaha, nan ta indistinguibel. Tin mas cu 300 especie di paloma na mundo.
E Blauduif ta un paloma grandi di 35 pa 40 centimeter, su plumashi ta color shinishi scur y e tin pluma den tono cora of maron cu ta lombra blauw den solo. E pluma na su cabes ta parce scama, loke ta splica su nomber cientifico.
Rond di su wowo, e parti cu no tin pluma, ta color cora pa e macho mientras e hembra tin un color mas geel. Su pianan y base di su piek ta cora, mientras e resto di e piek mes ta color cla.
Ta haya e sorto aki den Caribe pero na Aruba no ta hay’e casi mas pa wak. Por haya uno su so of den grupo chikito ta come fo'i palo of grawata vloer pa cuminda. E especie aki ta menasa pa hende y bestia, tambe pa via di horcan cu ta afecta e vegetacion y medio ambiente cu nan ta depende di dje. Si e Blauduif ta sintie den peliger, e ta bula bay. E Blauduif ta pone un of dos webo den un neishi cu nan ta traha den palo di mata. E parha aki ta come fruta y simia di mata. E Blauduif tin un rol importante den e ecosistema, e ta yuda saca simia y polinisa matanan. Den pasado hende a come hopi di e Blauduifnan.
