Mientras ta introduci prohibicion di viaha pa paisnan di Africa... *Cambio di maneho Covid-19 ta pa e prome siman di December
ORANJESTAD (AAN): Dialuna ultimo, Prome Minister Evelyn Wever-Croes hunto cu Crisis Team a informa di e ultimo desaroyonan di Covid-19 na Aruba.
Prome Minister a remarca cu tin 3 factor di preocupacion. E prome ta e factor local. Aruba den fin di aña ta custumbra di tin mas celebracion, e periodo cu hende ta mas cerca di otro. “Nos a wake aña pasa caba y e aña aki nos no kier pa e ripiti y drenta den un otro ola”.
E di dos factor di preocupacion ta e variante nobo, Omicron cu ta bin di paisnan di Africa. En conexion cu esaki, Gobierno a anuncia un prohibicion di viahe pa e paisnan cu ta wordo considera e epicentro di e variante aki.
Crisis Team y Gobierno ta siguiendo e desaroyo aki hopi di cerca. Por ripara cu e expertonan mes ta cauteloso den duna cierto expresion. Omicron ta mustra di ta un variante mas contagioso. E no ta mustra ainda cu e ta un variante mas peligroso pero mester dun’e tempo pasobra awor e ta cuminsando.
“E impacto di cera frontera cu e paisnan Sur-Africano aki cu ta wordo considera epicentro di dje, no ta grandi pa nos. Nos no ta haya hopi bishitante di e area aki por lo tanto e no lo tin gran impacto pa nos pero e lo ta un bon motibo pa cuminsa prepara p’e. No solamente esnan cu ta biba den e area aki pero bishitantenan cu den e ultimo 14 dianan tabata eynan, tampoco lo wordo permiti pa drenta Aruba. P’esey nos ta cuminsa prepara pa e no drenta na gran escala na Aruba”, Prome Minister a duna di conoce.
E di tres factor ta e situacion na Hulanda y Prome Minister a duna di conoce cu tambe lo enfoca riba bishitantenan procedente di Hulanda pasobra Hulanda ta wordo considera epicentro di e epidemia den Europa. E situacion na Hulanda ta hopi delicado pa loke ta trata Covid y esey ta influencia tur esnan di Hulanda cu kier biaha bin Aruba.
MANEHO ENTRANTE 4 DI DECEMBER
Entrante 4 di december lo exigi cu tur esnan cu ta bin di Hulanda (cu no ta residente di Aruba) :1) Mester haci test prome cu bin Aruba (Antes por a kies pa haci e test na Aruba). 2) E test mester ta haci dentro di 24 ora. (Antes e por tabata 3 dia prome cu biaha, awo e ta e dia prome cu biaha)
“E ta dolor, mi tambe tin un yiu ta studia eynan pero e medidanan tin cu conta pa tur hende pasobra awor nos mester pensa riba Aruba y e recuperacion cu nos ta den. Nos no kier haya nos den situacion di lockdown atrobe, pero nos ta mirando un variante nobo. Nos no ta den momento pa drenta den panico pero si di precaucion. Nos tin Delta pero e importante ta cu e manera pa defende nos mes di e enemigo invisibel aki no a cambia. Nos tin cu recorda cu uzo di tapaboca ta keda obligatorio paden, higiene, handsanitizers ta cosnan cu mester ta in place na tur etablecimento, tene distancia di otro y si bo tin sintoma bay test, Prome Minister a expresa.
